Дагъыстанашура Сухраб Ахмедов йишир а ц1ухьудхьусды Россиядид Йигит специальный военный операция ка1ч1удыла хъуъ. Гьа хабар выъыр ай джуду официальный telegram-канала РД-над Кьухние Сергей Меликова, гьухьур, Сухраб Ахмедов – бала Ватан хъывгад, дирид хасиет ва йыхды йик1 ад инсан и.
«Ихьды инсан – эскеред хизындид йиъи. Гьанийды дид, Султан Исмаилович Ахмедов – полковник йиъи отставкади ад Лакский райондады, ва нин – магьа1лим риъи, гьу1мирдихьван мехьтебе хынимешис дарс выд. Гьаламатдиш, гьасад хизынди йишин гьекъийкъатды йигит.
Ахмедов Сухраба лабт1а выъыр Новосибирский высший эскерешды командный училище, хьеликана Москвади ад М. В. Фрунзед дур гъад Эскерешды академие. Гьили гьа эскерва1ле йиширдики – Новосибирскади, Буйнакскади, Батумиди, Алейскади – юкьсура дюзгинне кьуле гыргарай джуды долг, дегиш джыъыр садаки джуды принципбыр.
Спецоперация ка1ч1уд сахьусды сыдыла хъуъ да1гьвиед к1еэ гине Сухраб Султанович – командирне йиъий, хъы1джырха1ре маддыбишды йыкьа1хда ва мысга саджигиди ана джуды эскерешихьван. Гьанийды гиджич1инва1лире, дирибашва1лире ва балагема эскерва1ле йишинире эккед кюмег вылц1арай кьуле гыргас дагъамды да1гьвидид кьарарбыр. Лап зурбана джуды йигитвалды гьувга выъыр гьание Курскади ад направлениеди – сахьусды джетинди джигиди.
Дагъыстанабишды джама1хтид таарихди йигитер, дирибишды ва шуба1валды увуху1д инсанар бала дишири. Ва гъийгъа ки, ц1инды джетинвалдыма е маа гьагва гьаъара, Дагъыстан – накьв виъид гьекъийкъатды йигитешды, са джетинвалдымыла хъуъ люздирчед, ч1ел хывыркьад ва йыггад гвалах кьуле выгыргад. Гьадыла йиъи ихьды республика виъид сиене регионмыла бала дывыд валаетдис Россиядид йигитер СВО ка1ч1удыла хъуъ.
Сухраб, къутли виший вас эккед Россиядид Йигитвалды! Гьац1ара, гьа ва увуху1с гьу1мирдыхьван элаа хьура хывкьыр, Ватан увуху1д кал! Къисмат гьаъара вас сагъды джан, гъалибвалды, е гют1ир ад балагема. Вы ихьды Гьунар йиъи!» – кихьир ай республикадид кьухьние.

Б. МЫХАIДЫ