Изды шу Султанаев Идрис Султанаевич гьухуд йиъи Мыха1 мукъа1, Мыха1д районди 2 майес 1964 сыда эккед хизындид арыди.
Дид — Султанаев Султаный, Нин риъи Султанаева Гюльдесте. Диде балад гвалахбыр гьыъыд йиъи районди, ху1кийметес ки, джама1хтис ки, кьу1не сельсеветвалды выъыри джуды мукъа1. Мукъу1с балад гедгасды гъа1быр, ра1хъбыр, клубыр гьыъыр. Лалаъанад хьед йыгын колхузад багъди, гьанийды мурад виъий, йыгын ки гьыъыри. Джуды духрешис ки тербиет гьасад выри, ху1киймет уху1н ха1р са илсындид бырдж и, хьур.
1980 сыда Султанаев Идрис Султанаевич мехьтеб лабт1уйне руъура кьыле ваъас Владимир шегьерди, сельскохозяйственный техникума. Гьа лабт1уйне Совет ху1кийметере армиди сес выъыри — 1985 сыдыла 1987 сыда йишир армиди, Кяхта шегьерди, Бурятиедид АССРди. Военный пешидид иесси ий командирне, душманад ха1льма хьуъдыбыр рыхыIд турахда хъуд. Арми лабт1уйне, мукъа1 хъиркьыр. Секретар ий мукъа1 ад Райком комсомолад дружинадид организациедид.
Ми джибрады гвалах ваъара ай Мыха1 сельсоветед седриед заместитель ине, гвалахак кине заочно кьыле хъаваъара, 4-хьусды курса ай Дагъыстандид сельскохозяйственный академияди.
Мида да1гьви кувч1уйне 2022 сыда, гъилы лирхьур, рухьура: «Ихьды ватан увухуIр йыгыра, е гийтхьир сыкьыIр йыгардиш. Зы маIгъв, вы маIгъв, бес выдж выш руъуси, хъуъ луьздир йыгардиш, да1гьвияла гич1 выъыр». Гьаса хьур, рыхьц1ыр сен руъуди, джуды гьашкьлива1лихьван йыхьыр Приморский крайди, гьада ки дюз Донецкади да1гъвиед йыкьа1, гьемен джу армиди выьыд пеше хыле луьвшур зенитчиквалды ваъара ай. Мыха1 хъиркьыр, отпуска выр. Джама1хьтихьван гуьруьшмиш йишир выд гафмыс дживабыр хъывыр, мехьтебе ад хынымешихьван сукьун, лузун йириши, гьабишис ихтилатбыр гьыъыр, Ватан ес шууна лаъ хъуди.
— Ва1с гьеч ул муву1гъ.
Е да1гьви ки лабт1а выъыр мида, гьаалиб душмана дишир, хъидыкьаси. — Гьаса гьухьур хъа1рхыIд, пехотади ирхьур, хъиркьыр диш.
Гъийгъа Султанаев Идрисе джама1хьтис джуды йигитвалды гьувга выъыри.
Гьанийды ч1елбыр, джухда вишид къанаджагъвалды Ватан бадана, йик1иыла мысна убхасды диш.

Б. РАМАЗАНОВА