Гъийгъад газетала хъуъ йе кахъаIчIур а тааныш даъара ихьды газет кьыле гьаъад хуIрметли юлдашер МыхаIд районди ад Киче муIкъаIды шаиред Гусейнов Саид Султановичды цIинды шиъирмыхьан. Выхьди диванада вылцIара гьанийды шиъирбыр, кьимет вын бадана.
Итид дад
БычIимыхьде къизилгюл ка,
Нахджирмыхьде вы билбил ка,
Изды бахт, къам, изды мырад,
Изды даваа, къисмат, умуд,
Гьаджаргур вы йыгъбыр шумуд…
Лаъ гамарыхъ вы хаIлмыхда,
Аджагыр сир, ришир есир,
Зулмытдихьде сиргъеси.
Вахьван зык ки бахтсыз маъ,
Дерд кывыр, хал-лахсыз маъ.
Лаъ ламаIруIгъ вы хаIлма,
Виригъ гъад йыгъ маъ мычIахъа
Ихьды йыкьаI,
ЙыкьаIа са бан луза гьыъыр.
ГъыIдилды риш дишегьли ка,
Гамарыхъ, джан, гюзелды,
КьваIб ул – кьваIб уIр, гуза выъыр.
Дуьнйа сиъин зас выйники,
Йикесдиш, рыш, гьеч шад зы.
Девлет диш, джан, выгад зас,
Изды даваа – итид дад вы…
Шыв иде и хьывахьван,
Эвел, аахир зас йыгар а
Вишир анджах са вахьван.
***
Гьагъзыр сенбыр джуду раIхъне
Виъид нацIур лувза маваъ,
Хьура эккед бенд йитIир.
Муьгьуьбетед раIхъ чIир маваъ,
Гьавгва ваъар хырыда къенд,
Гьарамзадад фенд йитIир.
Гьамыъ адан
1
Дуст,зы йикьис мадана,
Закла кIаъды
Хыных хъикис йыгаIдий
Кьвунды йыгъа адана.
Хъулхъасый зы са хылиски,
Хыныхвалды гьаджавгуд,
Хыныхна зы хиле хывкьас
Са игрушка аджавгуд.
Ес гьацIад са дандакьбыр на
Адалдыхъбыр, кIуIнимер,
Усуд туфанг кьаIчIе ана,
Е, солдатар, дамах хана,
Дюлхъерей е — хынимер.
ХапIаед хьаIл, хаIнед джыгал,
Кимабана данахьде.
ГъаIлер яхда адиший.
Дуьлхъерей е мыкырмы,
Кьвабыр гихьир кьанахьде,
ХъиджичIере хала е,
ЦIамды адан виргъид нур
Кимада, хьур, банахьде.
ТIалхъыр, сучIур
Бадубыр на шаталбыр,
Мыкь ки гипхьур кандихьде.
СигIыд, къуруд са джыгаки
Кимаадиший джандихьде,
КийтIердиший ядалбыр,
ГичIерей ес нахаIн ниндаа
Агаси, хьур, яталбыр.
Сагъул нинис- инсафсыз диш,
Яталбыр зас агырдиш.
ДжваIр ки гине завалахьде
Нинабаше гьаIцIулана
Гадургъар е кавалахьде.
Выше сидкьыр къуру хъыъыр
Сиъин ихьды валыгмар…
Бабара ки, надиндж маIгъ, хьур,
Къенд вылцIарай галагма.
ДжамаIхьдихьан дешерей е,
ДаIгьвида тел хъибкьыйне.
«ВыгIылды дух ешеддиш», —
Лал-гьарайбыр гьаъарай
Бабара, хъаIл либкьыйне.
ЯIхъ гьаъарай даватахьде
Агаси, хьур, илесды,
Кеф йикесды, хьур, сересды.
Худа итхьур
ГIал ки, хыл ки телесды,
Вахт адиший
Гьалгасды на сиресды…
Дуст, зы йикьес мадана,
Закла кIаъды
Хыных хъикес йыгаIдий,
Кьвунды йыгъа адана,
Хъулхъасий зы хынимешихьан,
Хыныхвалды гьаджавгуд,
Хиле хавкьас
Са игрушка аджавгыд.
(Кичинский говор)
Б. МЫХАIДЫ
