14-хьусды февралес 2026 сыда Хъылда вишир ай иджлас. Мисте кьва1д сен тамам йишир а Россиядид Йигит, гвардии полковник Магомеджанов Магомедали Камильевич дуьнйадыла йигитне гьархы1д йыгъала хъуъ.
14-хьусды февралес 2024-хьусды сыда гьа мыкьлана яраллы йишир ана, лийкьа гьыъыр ай Севастопольди ад госпитале, амма выдж кюмег хъич1есды ха1ле адиший. Гьа йыгъа кичмиш йишири ихьды офицер.
Йигитва1лид гьунарбыр гюзет гьыъыр, Магомеджанов Магомедали Камильевичис посмертно выри кьухьды ху1кийметед награда — звание Россиядид Йигит.
Магомедали Камильевич гьухуд йиъи 1-хьусды январес 1967-хьусды сыда Хъылда му1къа1. Джигьил ва1ляа хъуъ гьанийды йик1а1а лувзур ай Ватан увуху1н — джуды гьу1мирдид ра1хъне кеп1ес хьур. Армида хъиркьыр мадана гьание джуды йик1ыы гъад къадам лихьири — кьыле ваъас ква1ч1ури Рязанское высшее воздушно-десантное командное училищеди. Гьа училище лап1т1уда хъуъ гьа служит йишири морской пехотади, хьа1ликана гьание иштрак гьыъыри Северный Кавказди йишид гьакьасабыр арыди-саныди хъыгад вахтинды, ва гьадыла хъуъ Сирияди сихьир ад боевой задачабыр кьуле йыгыри.
Джубрады вахтинма гьанийкла йишир ай 18-хьусды армиедид командующиед заместитель. Магомедали Магомеджанов йиъий эккед баджарыхбыр ад регъбер, ва гьание джуды йигитва1лид дарс выри джуды хылихьде дишид джигьил офицерешис не эскерешис.
Хъылда вишид маджлисе иштрак гьыъыри Мыха1д райондид кьухьды Сулейманов Давуд Амаевиче ва мадды къуллухчийше, му1къу1д инсанаше ва Магомедали Магомеджановад яр-дусташе.
Гьади йидкьыр ад инсанашис Давуд Сулейманова ихтилат гьыьыри Магомедали Камильевичикла ва гьанийды йигитва1лид гьунармыкла. Гьание гьухьури: «Магомедали джанде кьухьды гиджич1ед йик1 ад выг1ылды дух йиъий, гьанийды йик1 ха1ммише ватандид архыйнва1лихда гьулхьара ани йиъий. Ихьды бырдж йиъи, гьанийды гьунарбыр йик1иыла утха джыъын».
Давуд Сулеймановыла хъуъ гьалгыри Хъылдад му1къу1д седри Ашурбеков Даир Ашурбекович. Гьание гьухьури:
-Магомедали Камильевичды дур ха1ммише ихьды йик1ыы гъадгасды йиъи ва йик1иыла удхасдиш гьание выд дарс — Ватан шууна хъывгыр йигад виъиди ва шууна уву1ху1р выгад виъиди. Е эккене шад-гуямиш диъи гьасад инсан ихьды накьудыла лиркьыд йиъи, хьур.
Йидкьыр ад инсанашде сагъул-варулбыр гьыъыри Магомеджанова Муслимат Шахбазовнара, гьа риъи ихьды йигитед къари.
Маджлисед ахирес Магомедали Магомеджановыс лихьир ад сирилладид улихьде лихьири быч1быр ва Йигитед хатирес гийтхьири т1екьийкьеды.
Россиядид Йигит Магомедали Камильевич Магомеджановды йигитва1лид дур мысга йик1ыы гьадгаси Мыха1д райондид сиене инсанашис.
Зарема ИСРАФИЛОВА
