Дагъыстандид кьухьды Сергей Алимович Меликов гьалгыр ай ашкара гаъас лечIур ад хъачахвалдымыд суалмыд бадана.
Гьасад бала лаазимсызды гвалахбыр йишир анийиъи шумдыъиди сферади — стройкамыд, кьылебыргьыъынмыд, социальный обслуживаниедид кьуле гид идарама, земельный отношениемыд джываб гъад идарама, здравоохранениеди… ва гьамыхьван сытIа хьуъ гийтхьур а мехьтебед бухгалтер не директор ари хана магьаIлимешис ад выплатамыд тангымыкла ери джваIршис сатыр ад ки.
Хьеликана сабыйды муIкъIа адишды, кьухьды кьиметбыр кихьир ани йиъи хьедбыр гыргад гвалахмыд кьуле гидбише.
Са-сад социальный фондмыра чIирине выр анийиъи субсидиебыр халды усул дуьз-дьузгюн выъын бадана вылцIад.
Районмыд администрациямыра чIирид документбыр выр, дагул выъыр а горюче-смазочный материалмыс сивыгыр ад танга. Районмыд сельский хозяйствадид управлениемыра дагул гьыъыр а мал-къара бала гьаъас сигыр ад шийибыр; социальный фондмыра нинабашды капиталбыр чIирине гъаъ эгъетIир а.
Дагъыстандид кьухьды Сергей Меликова гьухьури: «Яни рышвабыр лешур адбишды суалмыд дерде анидиъи правоохранительный органмыд къуллухчиер, ва гьабишды джываб агъырды йикиси.
Регионад кьухьние генеки йикIыы йыгыри гьамыъ кал цIинене хьуъ гийтхьур, гьацIара йишир ад тангымыд дагулвалдыбыр.
Зарема Исрафилова