Республикади агъмиш выъыр ай журналистешды байрам — российский печатад Йыгъ

13 январес Дагъыстанад меркезди Махачкалди эккед мероприятиебыр йыгыр агъмиш выъыр ай СМИ-мыд сиене къуллухчийшды гвалахад байрам — российский печатад Йыгъ. Гьа байрамад йыгъа Дом Дружбадид актовый зала Дагъыстан Республикадид Правительствадид Седри Абдулмуслим Абдулмуслимов хаIсил йишир ай регионад журналистешды сообществадид юлдашешихьван. Гьание РД-дид кьухьнийды Сергей Меликовад суруула къутли выъыр республикадид медиасферадид къуллухчийшис гвалахад байрам.
Премьерахьван хаIсил дикис ягъмиш дишир ай Дагъыстанад СМИ-мыд къуллухчиер, йицIды сыдырмыла бала гвалах выъыд, гвалах ваъара каIчIур ад джигьил журналистер, даIгьвидид корреспондентер республикадид не ва федеральный СМИ-мыд.
Абдулмуслим Абдулмуслимова Дагъыстанад СМИ-мыд къуллухчийшис ва ветеранашис байрам къутли ваъад гедене, эккед кьимет выр ай гьабишды замгьитдис, гьухьур, журналистика — са хабарбыр гьагун ва хаIр са дур-ун ад гвалахакла вахтинди ера дыхьыр ихтилат гьыъыныла саваенди, эккед бырдж гъад, джываб гъад халкьдид улихьде гвалах виъи, хьур. Гьание эккед сагъул-варулбыр гьыъыр сиене регионад медиасообществадид къуллухчийшис Дагъыстанад дур лаъ-хьуъ гьаъас чалыш диъинис гюре ва дюзгинне сиене гьакьасабырмыкла хабар выъынис гюре инсанашис.
Джураана эккед кьимет выр ихьды дагъыстанабишды корреспондентешис не операторашис, иштрак гьаъара ад специальный военный операциеди, гьабише гыргара ад репортажмыс ихьды эскерешихьван сытIа ана даIгьвиди, гьидылана гич1 джывыъыр.
Абдулмуслим Абдулмуслимова гьа йыгъа выр ай наградабыр, сахьусды кьул даIгьвидид корреспондентешис. Байрам къутли выъыдыла хъуъ Дагъыстанад кьухьнийды Сергей Меликовад суруула ва джуду суруула «НТВ» телекомпаниедид корреспондентес Омар Магомедовас ва операторас Рабадан Магомедовас выр ай Правительствадид суруула Почетный грамотабыр. ДаIгьвиди ана гьади иштрак гьаъас ледкьырдиш Дагъыстанди ад «Первый каналад» корпунктад кьухьды Гусейн Гусейнов ва гьадид оператор Фарид Муслимов.
«ВаI гьекъийкъатды йигитер диъи!», — гьухьур премьере.
Эккед кьимет выр ГБУ РД «Этномедиахолдинг «Дагестан»-хьур цIинды идарадид гвалахас, ва гьадид национальный газетмыра выгыргара ад гвалахас, суджугун бадана нинды чIел не ва ихьды атабабыйшды гьадат-нубатбыр.
Сиене сытIа наградабыр выр ай СМИ-ма гвалах ваъад 30-ды инсанас.
Гьадыла хъуъ Дагъыстан Республикадид информациедид ва печатад Агентствади российский печатад Йыгъад байрамас гюре выгыр прессадид Бал. Гьа гвалах Агентствадихьван сытIа кьуле выгыр ай Россиядид Союз журналистешды регионад Отделениедире. Гьа прессадид Бала иштрак гьыъыр ай сиене республикадид министерствамыра, региональный ва федеральный Иджласмыд депутаташе, сиене региона ад СМИ-мыд кьухьдыбише, оператораше, монтажераше, газетбыр на китабыр агъахад издательствамыд къуллухчийше ва мадды сес выъыр ад мийманаше.
Гьади российский печатад Йыгъ къутли гьаъади сиене республикадид министреше ва ведомствамыд на управлениемыд кьухьдыбише ки эккед кьимет выр регионад СМИ-мыд къуллухчийшды гвалахас, дюзгинне инсанашды къавгъу-дердимыкла хабар ваъара хьур республикадид кьухьдыбишис, йигитеше ка выгыргара ад да1гьвиди дагъыстанабишды корреспондентеше гвалахас, мадды сиене республикади кьуле гыргара ад гвалахбыр ашкара гьыъынис гюре инсанашис.
Ха1р министерствадид кьухьнийды къутливалдымыла хъуъ выр ай корреспондентешис, операторашис, монтажерашис ва мадды печатад издательствамыд къуллухчийшис балад наградабыр: тангымыд премиябыр, грантбыр, Почетный грамотабыр, Благодарственный кагъатбыр ва быч1имыд дестебыр на подарокбыр.
Йыхды кьимет выр ай ихьды газетед къуллухчийшиски:
— Ху1кийметед Думадид ФС-дид депутат Джамаладин Гасановад дуруула Благодарственный кагъат тангымыд премиядихьван сыт1а выр ай «Мыха1бишды ц1инды хабарбыр» газетед отделед редакторас Магомедов Байрамбек Бейдуллаевичес, балад сыдырма гвалах выъыр хьур национальный газета;
— Йыхана иштрак гьыъыр, хьур, «Рутульские новости» газетед редакциедид коллективере Каспийскади выгыд цифровой форума-2024 баш редакторас Махмудов Тимур Керимовичес выр ай Багодарственный кагъат РД-дид Цифровой Министерствадид кьухьние Юрий Гамзатова;
— «Рутульские новости» газетед» корреспондентес Таибов Расим Ямудиновичес РД-дид инфомациедид ва печатад Агентствадид кьухьние Абдуразак Джамалутдинова выр ай Почетный грамота газета йыхана агъмиш выъыр, хьур, «Земский доктор»-хьур рубрика.
Гьадыла саваенди сиенебишик кине ихьды редакциедид къуллухчийшис выр ай Россиядид Союз журналистешды ц1инды билетбыр.
Ехьван балагема гвалах выъыд корреспондентес Саид Сулеймановас РД-дид Правительствадид суруула Абдулмуслим Абдулмуслимова выр ай Почетный грамота.
Сиене СМИ-мыд къуллухчийшис генеки е къутли ваъара джуьхьды гвалахад байрам — российский печатад Йыгъ!

Б. МЫХАIДЫ