Ху1кийметед таарих асыллы йиъи гьасад инсанашила, джетинды вахтинды, хъуъ люджиздир, йу1кьды бар джуды йыкьа1а левилъэд, лазимва1ле хьурад кьуле га1дч1ур ватан абад ваъас чалыш дуруъуд.
Бейденекал йибкьыр ай йыхды са хабар Дагъыстанабыр на Северный Осетиедид джамаха1т шад ваъасды. Подполковник Саид Магомедович Ибрагимов йишир а 19-хьусды Дагъыстанашура «Герой Российской Федерации» звание выр ад специальный военный операция беслемиш йишида хъуъ.
Саид гьухуд йиъи Калкни му1къа1 Дахадаевский районди 26-хьусды февралес 1996-хьусды сыда. Сахьусды тербие не угут лешур а ихьды йигитере джуды гьухуд ватанды, гьа виъи куьйнед му1къ, гьадат-нубат, ламыс-гъа1ръят гюзет гьаъад. К1аъна мадана гьанийды йик1е ай ватан увуху1с йикисды ра1хъ к1еп1ес, хьур. 8-хьусды класс лабт1уд кал Саиде сахьусды гъил лихьири джу кеп1ид рыкъы1ы1. Гьа ква1ч1ури Северо-Кавказское суворовское военное училищеди Владикавказди ад. Гьади гьание джуды магьа1лимешды куьмгихьван лешури суворовцыйшис лазимды дарсбыр.
Училище лабт1уда хъуъ гьание кьыле хъывыъыри Дальневосточный высший общевойсковой командный училище, гьадыла хъуъ хыле лешуд билбиц1ехьван Саидды ачых виъий джу кеп1ир ад пешидид ра1хъ. Специальный военный операциядид сахьусды йыгъырмыла хъуъ гьа гинийиъи хьурад кьуле передовоя, гьади гьанийис лазим йишири сиене джу лешуд дарсбыр. Гъийгъа, гьала кьухьды ешбыр адишды, хьибц1ыр сенки гъиджийкьыр ад подполковник Ибрагимов Саид мотострелковый полкад командир йиьи. Гьадире рухьура гьа кьул-кьулук кид тактик йиъи, хьур.
Дагъыстандид кьухьды Сергей Меликова джу сахьусды хабар выри ихьды халкьдис Дагьыстанашурас кьухьды награда выр а, хьур, ва гьание гьухьури — гьасад баджарыхбыр ад, джанде йик1 ад командирешды гьунармыра армия гуджлы ваъара. Сергей Меликова эккед сагъулбыр гьыгьыри офицерес ва гьанийды дидис. Гьа гьалгыри телефона Йигитед дидыхьван — Магомед Ибрагимовыхьван, гьанийис Сергей Меликова эккед сагъул выъыри духарыс йигитед тербие выр а, хьур.
Северо-Кавказский суворовский училищедид магьа1лимешды ки кьухьды пай кинивиъи йыхды тербие выныд сураа ихьды йигитес. Аала-лаъ диъид училищедид телебиер ки гуямиш дикиси Россиядид Йигит Саид Ибрагимов ки джва1р кьыле ваъара ад училищедид телеби йиъий, хьур.
Гьемисагьа1тди ки Саид Ибрагимов СВО-дид зонади анийиъи ва гьание джуды хылихьде гид эскерешихьван сыт1ана кьуле гыргара анийиъи хьура гид боевой задачабыр.
Зарема Исрафилова
