Йе ихьды газета к1ыб-к1ыб ихтилат гьаъара ха1р джура пешебыр гьаъара ад инсанашикла: ма1гьа1лимешикла, духтурашикла ва мадды гьасад замха1ткешешикла. Гъийгъад ми ихтилат гейес йигара кьухьды замха1т гъад гвалах ваъара ад хьыдынийкла — Абдуллаева Роза Абдуллаевнакла. Гьа риъи райондид ЖКХ-дид къуллухчи. Гьание гьа гвалах ваъара ад виъи 2004-хьусды сыдыла хъуъ, ха1рне 20 сен гъийкьыр а.
Ха1р йыгъа йаьква1д кьулаа, эдеми-инсан халаа гъаъ гъа1ч1усмаа, гьание хъатхьыр, бала чалышене темиз гъаъара джуда выр ад центральный рыкъыд участок, са руг-ч1ых гьилине геджетир. Гьа гвалах гьание ваъара уула йиз-гьугъал гьугъара йишийне ки.
Гьадыла ха1р инсындид, ихьды-выхьди, бырдж йиъи, герексен гьа агъырды гвалах ваъара ад къуллухчийшды земха1таа кьиймет ливхьин ва ры1къмыд темизвалды увуху1н: хала ягъмыш йишид руг-ч1ых, са кьуцура ыъыр, мусорный контейнерма хагъун, миди, тини хьыблире т1елзе хъыджыъын бадана.
Генеки гьухьус йигара, Роза Абдуллаевнад дух Абдуллаев Рамазан Эфендиевич Специальный военный операциядид иштракчи йиъи, хьур. Къва1д сен не хъуна йишир а гьание гьади иштрак гьаъара ад, джан сихьир, ихьды хуькимет увуху1н бадана чалыш йиъид.
Гьаса джуды гвалах дуьзене кьуле выгыргара чалышды ва дуьзды тербие джуды хынимешис выр ад йигит духарды нинис, Роза Абдуллаевнас, йишидыхъунды артухды ху1рметбыр гьыъыр йигара, гьилды джуды гвалах ваъара ад идарадид сураа, ва райондид администрациедид сураа, гьанийис, гьанийды хизындис луьвгъу1д хыл-худ йывхы1р йигара.

Зарема Исрафилова