12 декабрес Российский Федерациедид Конституциядид Йыгъ йиъи, гьадис гюре ихьды ху1киймете юкьсура йыгыр а эккед байрамбыр.
Мыха1д районди ки гьа йыгъ уфтанна агъмиш гьыъыр ай. Байрамад къутливалды выъыр ай Мыха1д райондид кьухьнийды заместитель Ширин Омарова, кьылевыъынид Управлениедид къухьды Осман Исмаилова, ветеранашды Советед седри Эсрефил Дамадаева, культурадид халдид кьухьды Абдулла Абдуллаева ва мадды сыт1а дишир ад идарамыд кьухьдыбише.
Гьадыла хъуъ культурадид халдид къуллухчийше выр ай актовый зала бала быт1рад, лап уфтанды концерт, Конатитуциядид Йыгъад байрамас гьазыр гьыъыр ад.
12 декабрес 1993 сыда йишир ай Россияди сечкибыр, гьади джама1хтире джуьхьды сесбыр выр кьабыл выъыр ай Российский Федерациедид Конституция.
Гьадыла хъуъ 12-хьусды декабрь Конституциядид Йыгъ на йишир ад йиъи, ху1кийметед сабыйды арикид байрамад йыгъ на.
Конституция йиъи ху1кийметед бин сиене правовой системадид Россияди.
90-хьусды сыдырмыд ахирес Россиядид Конституциядис четин йишир ай кьву1нды политический кризисере, амани гьа четинва1ля лазим йиъид кал гъаъ а1хъа1ч1ури.
Хьурагине конституция РСФСР-ед СССР-дик кине кьабыл гьыъыр ай 1918 сыда, сахьусды СССР-дид конституция кьабыл гьыъыр ай 1924 сыда. Гьадид джыбра 1936 сыда кьабыл гьыъыр ай мадды, гьадид дур джама1хды идхьур ай «застойная»-хьур. СССР ху1киймет гийбхьума ани йиъий 1977 сыда кьабыл гьыъыд конституция.
Гъийгъа яхда ад Конституция — гъигъды бин йиъи Россиядид демократиедид лаъва1лид. Гьа лазимды джамаха1т бадана документ йиъи. Конституция инсанашис йиъи сахьусды къанун, гьадады баласды карбыр ес-ва1с гьац1ыр йыгад йиъи.
Гьамыъды конституциядик китхьур а дегишвалдыбыр — ихьды ху1кийметед кьухьды 6 сыда керъэре, хьур, ва Ху1киметед Думадид депутатар дикиси 5 сыдыд арыди — мидыла хьуъ гьабыр кет1илдед диъий 4 сыда.
«Сахьусды экземпляр» Конституциядид ад йиъи Россиядид Президентед библиотекади Кремлиди, гьадид гъара лийир а ирды темизды къыдыкь, гьады гъад герб гьыъыр ад йиъи гымышекла, къизилехьван кихьир а «Конституция России», хьур.
10 сыда 12-хьусды декабрь йиъий ихьды ху1киймете выхадниед йыгъ. 24 декабрес 2004 сыда Ху1кийметед Думадире кьабыл гьыъыри поправкабыр Трудовой Кодекса. Гьа къанунахьван Конституциядид Йыгъ выхадниед не мадиш.
Насир ИБРАГИМОВ
