7-хьусды февралас Райондид депутаташды Иджласад седриехьван У. Д. Гусейновыхьван райондид кьухьды Давуд Сулейманов гвалахбыр гине йыхьыр ай Йирекды дериди ад му1къма.
Сахьусды кьул гьабыр дыхьыр ихьды СВО-ди дыркьыд эскерешис гьыъыр ад «Сад памяти». Гьади гьыъыр дугьа1быр ва йик1ыы хъыдгыр ихьды йигитер. Гьа багъди йыдкьыйне, балана гедыркьара, шыв эккед кьимет ади гьабишды йигитва1лихда, ва ихьды сиъинбишды бырдж — гьабыр йик1иыла утха джыдыъын гьу1мирдихьван.
Хьели райондид кьухьдыбыр дыхьыр Йирек му1къа1, тааныш дишир сырымыд ер шууна гъигъе выъыр ади. Гьа гвалах кьуле выгыр ад виъий ерлид инсанашды чалышва1лихьван шесды сыда «Местные инициативы»-хьур программадыхьван.
Гьадыла хъуъ гьабыр дыхьыр Аады К1ат1ры1хъ, Гьаракъу1ле ва Элды К1ат1ры1хъ. Ха1р му1къа1 мийманар гюзет даъара ай джама1хтире ва гьади ягъмиш дишибишихьван ачыхана агъмиш гьыъыр ера лаазимды, кьуле йыгыр йыгад джетинды суалбыр.
Гьадыла саваенди гьабыр а1ч1ур гадкьы1р му1къма ад мехьтебырма, гьыъыр лаазимды га1ш-мыкьбыр, ихтилатбыр магьа1лимешихьван ва телебийшихьван. Райондид кьухьние эккед кьимет выр магьа1лимешды гвалахас, телебийшды чалышва1лис кьыле ваъас — гьадыла бала асыллы виъи райондид лаъвалды деледжег, гьухьур Давуд Амаевиче.
«Мидыла хъуь ки е к1ыб-к1ыб дуруъура даъас сиене му1къма, ха1сил дишир ерлид инсанашихьван гьац1ара гьаъас гьабишды къавгъу-дердибыр, гьадыхьван сыт1а гвалах мааки вирхьас ха1р са инсан бадана»,- гьухьур райондид кьухьние Давуд Сулейманова.

Б. МЫХАIДЫ