МыхаIд районди выгыр ай иджлас АО «РСУ»-дид кьухьдыбише Южный Дагъыстанди ад филиалмыхьван

18-ды июлес МыхаI муIкъаI республикадид АО «Ремонтно-строительное управление»-дид «Рутульский» хьур филиалад базади выгыр ай иджлас. Гьадид натиджа ки виъий: 2024-ды сыдыд рыIхьды вазыра йыгыд гвалахмыд итогбыр йыгын. МыхаIд районди сытIа дишир ай республикади ад раIхъбыр, гъаIбыр усла ана ухуIд, ва гьамыд ремонтбыр гьаъад, генеки цIиндыбыр силхьед къуллухчиер.
Иджласад гвалах выгыргара ай АО «Ремонтно-строительное управление»-дид кьухьнийды заместитель Джабраилов Али Магомедовиче ва ми идарадид кьухьды бухгалтеред заместитель Алиев Бахтияр Мусаевиче.
Миди, РСУ-дид «Рутульский» филиалад офисе, нубытдире хъадацур ай гьаатхыIд сурсыда арыди йыгыд гвалахмыд итоговый отчетмыхда, Дагъыстан Республикадид Агульский, Докузпаринский, Курахский, Сулейман-Стальский, Рутульский ва Хивский муниципальный районма. ГьаIр филиалад кьухды ва инженер далгыдаа хъуъ, АО «РСУ»-дид кьухьдыбише генеки хъывыр ай гьаIрнийис суалбыр, цифровой показательбыр гьацIара хъаъара. Бухкалтериядид сураа ки Бахтияр Алиева агъмиш гьыъыр ай сиене филиалмыд тангымыд сураады агьвалатбыр.
АО «РСУ»-дид филиал «Рутульское»-дид кьухьды Шафи Абдуллаева миди джуды отчета агъмиш гьыъыр мисед гвалахбыр: СП «Сельсовет Кальялский»-ед ераа КIусур муIкъаI выъыр йыгара цIинды раIхъ; «Сельсовет Гельмецинский»-ед ераа «Курдул – Гельмец» участока маашинмыд рыкъыIд четинвалдыбыр эхир арыди хъыгыр йыгадид; баласты маашинмыд рыIкъма гид гаIдды турбабыр хьуьлихьдымыхьван дегиш гьыъыр йыгадид, гьис хьурди юхбыр йитIкьыйне, гьабыр арцIыра, ва юхбыр рыIкъма игъипхьура, хьур; цIинды рыIкъмаа гвалах ваъасды техника выгадид.
Баласты филиалмыд къуллухчийше ки мисед суалбыр агъмиш гьыъыр ай: цIинды тракторбыр, грейдербыр ва бульдозербыр йыгадид, гьис хьурди техника лап йисе йиъи (советский вахтиндидбыр и, хьури); техникады гвалах ваъасды трактористер ва бульдозеристер цIам диъи, хьури.
Шафи Кафлановиче генеки миди гьухьури: кIыб кал, мыкьбыр йикис маа, сывымы ад филиалмыс лазим и горюче-смазочный материалбыр вахтинди лийкьа гьыъын, ва гьадид качество ки дюзгинды вишин, гьис хьурди йыхды дишды гедене, маашинмыд бензинед система чIир вуруъура; ремонт гьаъас лаазимды запасной частьбыр ки кIыб лийкьа гьыъын лаазим и, хьури, гьис хьурди техника лувурзара балагемаа, Махачкалдаа МыхаI запчасть лийкьама, ва гььадыла раIхъбыр дуьзгуьн хъаъасды гвалах ки лувурзара… Гьадис гюре хайиш гьыъыри меркездады кьухьдыбишдаа ми гвалахбыр учута лешур, вахтинди кьуле гыргас куьмег ваъ, хьур.
Сиене филиалмыд къуллухчийшихда хъадацуда хъуъ, миди итогбыр йыгыри Бахтияр Алиева на Али Джабраилова.
Выгыд гвалах гьаIсаба выъыри йыхдына, ва отчетбыр ки – лап дуьзгуьндыбырна. Гьадыла савайинды, гуьухьури: Минтранс РД ва Дагавтодор идарамыд кьухьдыбишис виъи хабар сиене миди агъмиш гьыъыд суалмыкла ва четинвалдымыкла. Гьадыыла гьабыр диъи чалыш мисед четинды гвалахбыр гьаъад къуллухчийшды дуллухбыр лаъ хъаъас, техника цIине хъаъас сиене филиалма, вахтинди ГСМ-быр ва запчастьбыр лийкьа гьаъас. Хьели ки выри поручение сиени миди ад филиалмыд кьухьдыбишис ва инженерешис, гуджли гьаъ, хьур, контроль рыIкъмыд магькамвалдымыд, инсанашды аIгьтиетвалдыбыр лаъ йишин бадана.
Ми АО «РСУ»-дид иджлас бегьем вуруъуд гедене Южный Дагъыстанди ад филиалмыд къуллухчийшис выр ай почетный грамотабыр. Ремонтно-строительное управлениедид «Почетная грамота» выр ай АО «РСУ»-дид филиал «Рутульский»-ед инженер Габибулаев Зиядхан Джабаевичес ки.
Гьадыла хъуъ районди йитIкьыд мийманар дыгыр ай гьагва гьаъас ихьды районди ад бытIрад джыгаабыр.

Къинады САИД