20 мартас дуьнйады гъадухъунды сиене мусурманаше къутли выъыр ай сивид-сывабад байрам. Ихьды республикади гьадис гюре выр ай йукъыд йыгъ выхадныймыд.
Гьа йыгъа сиенебише гьыъыр ай садакьабыр, дугьаIбыр, делегбыр ва байрамад суннат кубыр.
ЙаIкваIс сагьаIт гьуч1дис байрамад суннат-куб выъыр ай ихьды МыхаIд Галды мездикеки.
Кубад улихьдегине мездике сытIа дишир ад мусурман шубаI-ришиймаше гьыъыри зикр, такбир ва выр ай хаIр инсынды гъад фитр закаIт. Мисте закаIт йиъий хаIр инсындыла 150 манут. Гьа йыгъа ихьды Галды мездик увцIур ай инсындире.
Кубад улихьдегине сытIа дишир абишис къутли гьыъыри сивид-сывабыр МыхаIд Галды мездикед имам Абдулселим Таирова, гьыъыри къутливалдыбыр, къыле гьыъыри байрамад хутба.
Мусурманашис къутли выъыр ай байрам Мыха1д райондид кьухьды Давуд Сулейманова, гьание мисе гьухьур ай:
«Ху1рметли юлдашер! Ми Рамадан вазыра гьыъыд выхьди кубыр, ниятбыр, хиялбыр ва дилегбыр Аллагьара кьабыл гьыъый, да1гьви к1ыбди лабт1ур, дуьнйа эсля1х хъивикий, сиъин ихьды га1дийшис, специальный военный операциеди иштрак гьаъара ад, сагъна, шадна ва гъаалиб дишир халма хъидыкьас къисмат йиший, дыркьыд йигитешиcки Йинчид ра1хмет виший».
Хьели ихьды джамахаIт къутливалдыбыр гьаъара сасынийыхда халма дуруъура ай, ва сырымы дыхьыр садакьабыр, хайир дугьаIбыр гьыъыр ай.
Хынимер ки эккене шад дишир ай, гьисхьурди гьа байрамад йыгъа ийир ай хвабыр. Бала раазине гьабыр гадгъаIре ай маIхлида-маIхлиди ва хала-халма.
Сиенебишис къутли йиший сивид-сывабыр, гьагъзырды сывабырмы гьадагъуй.

Насир Ибрагимов