Ламыссыз

Инсындид хьесыма гахъас ры1хъ джугъу1д,
Мискьинек дуст маса вылц1ад ламыссыз,
Джуды таарих гирк1ыр, вырдыбыр рухьуд,
Ха1я дишне дуьнйады гъад ламыссыз.

Гьалыхдага а джуды дур цихилед,
Дурура улесды улере ара хивед,
Джыбрыра выды хьа1ли ул эгъвилъэд,
Т1ылымыс лейихды дур гъад ламыссыз.

Фергъа1вунад калды ягъа1д дилегбыр,
Арцыр Аллагь джус йыгади куьмегбыр,
Йик1ыы гъадиш, улихьдед, гьаатхьы1д вахтбыр,
Муьфдесызды садакьа джаъад ламыссыз.

Увуху1р диш нинды, ришид ва ху1рмет,
Шурадбишис выды бадана ад туймет,
Джама1хтире вас ваъасды диш ра1хьмет,
Невеледер белиди эдид ламыссыз.

Мувугъу1й алакъа ерисызахьванды,
Аахиретди вы йыкьаси дивынды,
Агь либхьуси тахсирдишды хизынды,
Бармакад кьанехьде йикьид ламыссыз.

ДЕРБЕНТ

Дерьягьахьван саргьа1т хакьыр ха1сар гъад,
Хьуд гъагъзыр сен выды таарих и, Дербент,
К1аъды пачалыгъ банымыд арыди ад,
Йидкьыд къушуммыс дживаб хъывыд Дербент.

Иессивалды выгадбыр бала ай,
Базарбыр безиргенешис йик1ыы гъай,
Къизил, танга савдыдисне хыле хай,
Миллитмыд мездикед бина ад Дербент.

Къырхлерешик йовгъц1ыр сыр ки асха1бийшды,
Куба гъана йыдхьы1д динды гъадбишды,
Нарынкъала девлет виъий ханашды
Тамашене даагьим гебгыри Дербент.

Деръягьад мирвари калды лепебыр,
Дарваза куйнедады туп къапибыр,
Вахда бала дикис йидкьыр гадхъа1дбыр,
Падишагь сучур гемиес йул выд Дербент.

Пайгъампарад вахда ризкьыд дугъа1 хъуд,
Ваакьие йибкьыхьвна, миди га1ш джувгъу1д,
Дженнетди багъди кал емишбыр руъуд,
Элдис, Вилаетдис дур-ун ад Дербент.

Бийзат РАМАЗАНОВА,
с. Рутул