Дагъыстандид кьухьды Сергей Меликова фашистешды блокададыла Ленинград абад выъынид Йыгъад бадана мисе гьухьур ай республикадид инсанашде.
«27 январь 1944 сыдыд – сиене СССР-ед миллитдид кьухьды мырад игъивкьыд йыгъ йиъий. Гьа йыгъ мысга таарихе адгасды йиъи Ленинград гъаалиб вишид Йыгъ йиъи, хьур.
Гьельбетдики, гьа йыгъаайикьама кьухьды гьазаб биъири Ленинград шегьерди гьа гедене ешемишды инсанаше. Амма ад аIгъвалатахда гаджадкъыIр, гьабише душманад улихьде кьул саъ выъырдиш. ХаIр са агъаIлиере джуды йигитваIлид дур таарихе сатыри. 872 йыгъа ситамаа садгъур залым душманад къагъыди анидиъий гьабыр. Ихьды къушуммыс бейде хаIчIусды са гьилине чара-минкир сабтыр адиший фашистеше, юкьсураа йитIе гьыъыр раIхъбыр.
Советский Союзад маршал Леонид Александрович Говорова аа сирхьер диший Ленинград душманада абад хъаваъасды фикир-ниятбыр. Гьание рухьурай «Ленинград душманад хылаа люхъуIвшун ихьды-выхьды сиенебишды бырдж йиъи, амани душман шууна-га тарг хъаъасды чара гьувгур йигара».
Кьухьды Ленинград шегьердыкла вишир ай ваеван чулкал ачыхды фронт. ВыгIле адишне, хьыле-хынымеше арыди-джаргыди выгыргара ай фабрикмыд на цехмыд агъырды гвалах. Аа-уу ад залымды даIгьвиед агьвалатас убур джыхыIр, кьуле гыргара ай сиене лазимды гвалахбыр: — ачых йиъий мехьтебыр, хынымешды садикбыр, китабханабыр, больницабыр, музейбыр, хьыв гьаъад заводбыр.
Гьа залымды вахтиндыы шегьерди мадад инсанаше кихьир анийиъи джурба-джура художественный произведениебыр. ЦIыед йыкьаI ад Ленинградди кид-кине вырыхыIре ай «Седьмая симфония» Шостаковичды, кьыле гьаъара анийиъий Ольга Берггольцды шиъирбыр ва джатIур ун ани йиъий метрономад.
Гьа вахтиндид гьазабыр, гаIш, мыкь мысна йикIыыла утхас йичIесдиш блокадникешда джваIршыда.
-Дагъыстанди ешемишды блокададид шийидерки анидиъи, гьабишды хатир-хуIрмет увуIхуIн ихьды-выхьды бырдж йиъи.
За икьрар гьаъара сиене гьа геденед гьазабыр летIир, къуртагъ хъитшибишис, гьа джетинды агъвалатак джахьвабыр диъидбишис ва ярах хана душманад хьура лаъ йигитне луьздир, гъалиб дишибишис. Миллионала артухды ихьды инсанар дыркьыри гьа 872-ды йыгъад арыди. Маа-маа гьасад писды вахтбыр мысна ки хъуIмагъуIй», — ихтилатад ахирес гьухьури Дагъыстандид кьухьные Сергей Меликова.
Зарема Исрафилова
