Дагъыстанад Кьухьние Сергей Меликова ихтилат гьыъыр республикади ваъара ад гьазырваIликла агъмиш ваъас ГъалибваIлид 80-сен йишир ад байрам.
«Ихьды ният йиъи гьа гвалах кьуле выгыргас бала бытIрана ва йикIыы гъабгасна балад сыдырма.
ВаIс гьацIара 2025-хьусды Ватан увуIхуIбишды Сенне гьыъыр а ихьды Президенте. Ва йески гьа Сен увуIхуIбишды йиъи Ватан, ва кьухьдыки, ва кIаъдыки, – ВОВ-дид ветеранашды, афганистандид-эскерешды, 1999 сыдыд гьакьасабырмыд иштракчийшды ва эскерешды, гъийгъа Россия бадана даIгьви выгыргара ад.
Ми йыгъырма выгыр ай республикадид оргкомитетед иджлас, агъмиш гьыъыри гыргасды гвалахмыд план. Дагъыстанди мысга сиене гвалахбыр уфтанна кьуле гыргара, йисхьурди гьабыр гьазыр гьаъабише ва гьамыд иштракчийше йикI сихьир ваъара гвалах. Сагъул РД-над джигьилешды министерствадис, кьылевыъынмыд министерствадис, халкьмыд организациямыс гьабишды инициативамыд бадана. Гьабыр сиене, гьелбетдики, китхьуси кьабыл гьыъыд планак, за дюз хъаъ, хур ад, гьыъыр гьа ягъаIд кал гъийгъад вахтиндире.
Символично йиъи, ГьалибваIлид 80-сен йишид байрамад гвалахмык йыхана иштрак гьаъасдыла гьамыъды Ватан увуIхуIре ад джигьлешды поколениедире — СВО-дид иштракчийше, байрамад мероприятиема иштрак гьаъаси эскерешды частьмыра, Дагъыстанди ад.
Баласды иштракчиерне дикиси джигьилер, кьваIдхьусды — ветеранар ва ми вахтинди спецоперациеди иштрак гьаъара абыр, хьибыдхьусды — гьабишды хизанмыра.
80-сен ГъалибваIлид — кьаIаIрды календаред йыгъ диш, гьа ихьды гьаIкъийкъатды таарих йиъи, ари дыъыр са даъад хьуъдыбыр на гьамыъдыбыр. ХаIр сыда, йе памятникмыда на обелискамыда ягъмиш дуруъуд арыды, СаджалхъаIд цIыяа лирхьеди бычIбыр, йе рухьура сагъул сиъинбишис, выш йиширди даIгьвиди, увуIхуIрди Ватан, ихьды хизанбыр, ихьды хал-лах. Ва ихьды хынимешеки гьа гвалахбыр йикIыыла утха джаъасна гьыъыр йыгара. Гьабишис гьацIыр йыгара, гьаIр къадам гьалибваIлиы йыкьама лихьир ай эккед йигитваIлихьван ва джуду валает хъывгынваIлихьван.
Сиене гьакьасабыр: парад, памятный акциебыр, ветеранашихьван ва СВО-дид иштракчийшихьванды ха1силвалдыбыр, выставкабыр ва спектакльбыр, фестивальбыр ва концертбыр, мадды веш мероприятиебыр йыгыр йыгара Дагъыстанад шегьерма на районма бала бытIрана, лазим йиъидкал. Хайиш гьаъара сиене дагъыстанабишда, иштрак гьаъ, хьур, гьа гвалахмык джухьды йикIяа лувзур, ихтилбыр гьаъ, хьур, даIгьвиди дишид бегедебишикла, гьабишды тарихмыкла ва йигитвалдымыкла. Бес гьа ихьды сиенебишды байрам виъи, ихьды сиъинбишды Гьалибвалды!», – гьухьур ай обращениеди.
Б.МЫХАIДЫ
