Гьадис гюре Дагъыстан Республикадид Правительствадид Седрие Абдулмуслим Абдулмуслимова мисе гьухьур:
«Йукьуд сен хьурагине Россиядид Президенте Владимир Владимирович Путине Дагъыстанад кьухьдываIле гьыъыр ай Сергей Алимович Меликов — генерал-полковник, дур-ун ад хуIкиметед, эскерваIлид, политикадид инсан.
ХаIр таарихтид вахт джураана джетинды виъи. Амма гьаатхыIд йукьды сыда йишир ай гьасад эккед дуьнйадид ва регионмыд гьакьасабыр, кьуле гыргас гьа вахтинди лаазимды хуIкиметед ва хаIр йыгъад гвалахбыр дюз-дюзгинне республикади йичIесий кьуле дирибашды инсан гине, кьабыл гьаъас руъуд гьакьды-кьулды решениебыр. Гьасад инсан йиъи Сергей Алимович Меликов
Хьурагине ки за гьухьур ай, республикади йыркьыйне Дагъыстанад Кьухьние кьабыл гьыъыр диш йыгъад-йыгъад кIаъды решениебыр, гьание джус ва правительствадид блокас кеепIир джетинды раIхъ — садана сиене лаазимды гвалахбыр Дагъыстана ад хьуъ гетIир кьуле гыргас. Сахьусды кьул, суалбыр кьылебырмыд, здравоохранениядид, хьидид ва тукмыд республикади. Луза гьыъын ва дюз хъыъын вешаала балад мехьтебыр, эккед водоводбыр, хьед темиз гьаъад сооружениебыр, кьуле выгын программа махкамды тукмыд — гьамыра эккене йыха гьаъас Дагъыстанад йашайиш.
Йе кьуле гыргара а шумуд иди национальный не республикадид проектбыр на ва программабыр Сергей Алимович кьуле гине ва гьанийды хуIрмет ана хуIкиметед кьухьдыбише регионас артухды хыл-худ вырыхыIре тангымыд ва мадды гьакьасабырмыд сураа.
Федеральный центрад куьмгихьван ва ерлид доходбыр ки бала руъура гьаатхыIд хьудды сыда, йишир лаъ гьаъас республикадид бюджетед доход 1,6 хылис. Валовый продуктад объем йишир а триллион манут. ГьаатхыIд сыдырма республикади выъыр цIинды 70 мехьтеб, гьамыкла 20 — мистед сыда, гвалах ваъара каIчIур а 70 цIинды хынимешды садикбыр. Больницама сихьир а гьагъзырна хьудвеш цIинды оборудованиебыр. Луза гьаъара а цIинды предприятиебыр, бала руъура а сельхозпродукциямыд объембыр, дюз-дюзгин гьаъара а юкьсура раIхъбыр.
ГьаатхыIд йукьды сыда дегиш вишир а Дагъыстан туризмадид сураа ки: гьамыъ ихьды республика кьыле выъыйне, гичIинид ериндире йыгара руъура дыкьас мидиъ, андахмыд ериндире гьабгура миди ад банымыд ва дерьягьад бытIравалдыбыр. Бегедене республикади гвалах ваъара каIчIуси цIинды туристешды комплексбыр, туристер мааки бала дыкьаси. Са цIамды вахт хьурагине гьады вышне инаамиш диший, амма зас гьацIара, Сергей Алимовичес мысга хабар виъий Дагъыстан мийман йыгад, бытIрад, лаъ-хьуъ ваъас йикисды ер виъид.
ГьуIмирди джугъуIд гвалахбыр адиш, ва шадды ки, ва пашмалды ки. Дегиш джыъыр адгыр йыгара йес хаIр гьыъыд атабабыйше карбыр — савалды, хуIрмет вишин, гедкьын ва са-сынийис куьмег вын, махкам гьаъад ихьды арабыр. СаваIлире йе мааки гъигъе дуруъура ва секинвалды вуруъура, гьамыра куьмег вылцIара лаъ-хьуъ йыкьас хаIр са инсанас ки ва сине республикадис ки. Гьа фикирмыхьван йе гвалах ваъара диъи сиене ми сыдырма, ва шад диъи гвалах ваъас кьуле гине инсан, сиене джуду гьуIмир ливере ад хуIкимет бадана.
Полный вперед, Сергей Алимович! Йе Вахьван, раIхъ дегиш джывыъыр, йаваш джитшир!»
Б. МЫХАIДЫ
