Октябрь вазыра МыхаIд райондид хынымешды творчествадид Хала дуруъура кьылеваъара ад телебийшихьван Регионад «Движение Первых», хьур, дур гъад отделениедид кьухьды специалист Фезлиева Айшат Исмаиловнара выгыр ай семинар.
Гьа семинара иштрак гьыъыр ай ДДТ идарадид магьаIлимеше не гьа идарадид кьухьды Султаналиева Минавер Алиевнара ки.
Минавер Алиевнара, сахьусды кьул, йиркьыр ад мийманас къутли выъыри цIинды гвалах ва къисмат гьыъыри йыхана-бытIрана кьуле выгыргас лювчIуй хьур гьа хынимешис ки ва хуькиметес ки лазимды гвалах.
Хьеликана Айшат Исмаиловнара кьуле эдири хынымер, «Движение Первых» шыв организацие виъиди ва гьади каIчIубише шыв гьыъыр йигад йиъиди.
Семинар бегьем вишида хъуъ ДДТ-дид телебийшис Айшат Исмаиловнара выъыр ай иддыбыр гъад устIул, гихьир ай сиенебишис чейбыр.
Аахирес ки гьание Минавер магьаIлимес выри бытIрад бычIимыд десте.
Сиене гьа семинарад иштракчиер рази дишири выгыр ад мероприятиеды ва лешури гьада лазимды дарс.

Зарема ИСРАФИЛОВА