Хасавюртовский районди эккед гьугъалмыра зиян-зарарбыр выд ер-юртмыхда гакьыр тааныш йишидыла хъуъ РД-дид Правительствадид Седрие Абдулмуслим Абдулмуслимова выгыр ай районный администрациеди гвалахад кьухьды иджлас профильный министерствамыд на ведомствамыд кьухьдыбишихьван.
Гьа иджласа вац1ара выъыр гьа вахтинди гьади ад агьвалат, гьац1ара гьыъыр, шыв гьыъыр йыгарди сахьусды кьул гьугълумыра ва юхмыра зиян-зарар выр ад джигабыр дюз-дюзгин хъыъын бадана.
Иджласа далгыр ай Минсельхозпродад, Минтрансад, Минстроед, Минэнергодид, МЧС-дид, Дагэнергодид, Дагмелиоводхозад, Агростроед кьухьдыбыр, РД-дид Халкьдид Маджлисед депутатар ва маддыбыр.
Тукмыд идарамыда гайиш гьыъыр ай йишидыхъун к1ыбди дюз-дюзгин хъыъыр гъилы лихъие, хьур, тукмыд синбыр, ахтармиш гьыъыр гьац1ара гьаъ, хьур, шыв ха1ле ади подстанциебыр ва трансформаторбыр гъад ербыр. Иджлас выгыргара ад вахтинди гьац1ара ай, шыв агьвалат ади ры1хьди ераа, тук адишне маданийиъи му1къбыр хьебыр лидхьур ад, ва гьухьур ай, газ наха1ды йыхы1р сихъигас, хьур, Кадыротар ва Чагаротар му1къма.
РД-дид Минсельхозпродада кьимет выр гьац1ара гьаъ хьур ай, шудаъ зиянбыр выр ади ма1хсилмыс ва гьамыс шыв куьмег выр йыгарди. Ад езелмыд агьвалатас кимет выс ка1ч1ус хьур а специалистер гьа сагьа1тди хьебыр гьама хъуъ хъишир мадана.
Дагмелиоводхозада хайиш гьыъыр ай, гьац1ара гьаъ хьур, шыв ха1ле ади инженерный системамыд гвалах ва шууна хьедбыр хъуъ хъаъара ади. Гьадыла саваенди ведомство макъыет викиси ма1хсилмыс хьедбыр гьабгъуд каналмы ва мадды хьидмыд объектмы.
Джурад поручениебыр выр ай ры1къмыд службамыс — агьвалат вац1ара ваъас рыкъы1д, ва чалыш диш хьур, ачых хъаъас му1къмыхда йиъид машинмыд ра1хъбыр.
Абдулмуслим Абдулмуслимова сагъул-варулбыр гьыъыр РД-дид Халкьдид Маджлисед депутаташис ва «Надежда»-хьур благотворительный фондас куьмег вынис гюре Хасавюртовский районди ад инсанашис.
Лавулт1ада иджлас Абдулмуслим Абдулмуслимова гьухьур, агьвалат джат1ур контроля гъанивиъи, ва сиене гъилы лийир ад службамыра сыт1а, хыл хыле выр, телесыхана сиене гвалахбыр кьуле йыгыр йыгара. Артухана убур йыхы1р йыгыра ха1р са зиян йишид инсанас, ва му1къмыд инфраструктурамыс к1ыбкал гьабыр дюзгин хъаъасна.
Юкьсура гвалах лувза джывыъыр выгыргасды йиъи, тааки сиене джигима гьакьасабыр дюзгин хъу1гъу1ма:
«Дагъыстандид Кьухьние Сергей Алимович Меликова хайиш гьыъыр а, йыхана чалыш диш хьур куьмег выс».
Б. МЫХАIДЫ
