Хала сыкьаI

Дуьнйаады джазаа гъа — коронавирус,
Са вакцина, дарман ыджывгыр ад джус,
Халкь, вы гьазыр виш зибилед джан лаьшус:
Уле-рагъ, амаа хIаIлалды хала сыкьаI,
Коронавирусада хырыда сыкьаI.

Сабыр выъыр, гуьткир, увуIх ваь давам,
Зарахьват диш: гьухьуд гьаъ, мадуIгъ гьаIвам,
Хьыв-хьед сихьир, холодильник ваъ тIарам,
Гьад захIиреда дагул диш, хала сыкьаI,
Къариед вирус лелъэре хала сыкьаI,

Шукур ваъ, гуджлид уьлкиди е а хьур,
ЭмиркIадис кине силгад маскIабыр,
Белке, йикIйы йидкьыхьуна кафэбыр,
Халды ваъара хизындихьван сыкьаI,
Иблисе-вирусадаа хырыда сыкьаI

Алчахаше дуьнйаады вай ивир а:
Коронавирус хьур лыIхды зай ливир а,
ХIуIр багьа хъывыъыр, джибе цIай ийир а,
Ваьде гьухьур а: — «Седцир хала сыкьаI.»
Зегьере-вирусада хырыда сыкьаI

Карантин гъа, гъигъе йиъи шегьербыр,
Накьвуды Китайда сигыр зегьербыр,
ДаIгьви адишне эдукур тегьербыр,
ДархIаIл дишир ки, шурад хала сыкьаI,
Вирана-вирусада хырыда сыкьаI

Эй, баныма ешемишды дагълыер,
Дагьрымы у гуямишды джанлыер,
Марухь: «Сывыма е диъи ханлыер!»
Хыдылар хъидкьыр, шегьердаа, хала сыкьаI,
Банымыра удухIуIси, хала сыкьаI.
Кьулуу Йиниш гъа, гичI мываъ, хала сыкьаI,
Джыбрыд йак кийир, хъинкIий ветере сыкьаI!

Шафи Амсари