Рамазан Абдулатипова иштрак гьыъыр Махачкалди «Устарашды Шегьер»-хьур аллея ачых ваъади

3

31 июлас Дагъыстанад Кьухьды Рамазан Абдулатипов ки ана Махачкалди ачых гьыъыр этнокультурный туристический площадка — «Устарашды Шегьер»-хьур аллея.
Гьади Рамазан Абдулатипова мисе гьухьур, меркез гьувгара-гьувгара дегиш вуруъура а. «Эккед гвалах выгыргара а шегьерди йыхды хьед йишин бадана. Сыдыд арыди дегиш гьыъыр а хьидид дурбабыр, темиз выъыр а  КОР. Махачкалди ад илсанашихда йишир йыгара темизды хьед, рагъас йикисды крана. Гьадыла саваенди, сыт1а выгыргад гвалахад гьунырдыхьван, Москвадид мэриядихьван ки, кьуле выгыргара а программа 60 куче усла-кьалба хъывгасды ва гьадухьунды ма1хлебыр ки. Амма гьаъас мадад гвалахбыр ки бала и илсанашды яшайиш мааки йыха йишин бадана. Эгер е гьа программа кьуле выгыхьвна мистед сыда, еда йикис гьасад гвалахбыр гьаъас йыкьасды сыда ки. Эгер е объявить выъыхьвна проектмыд конкурс, ва1 ки гьади йыхана иштрак гьыъыр йыгара», -хайиш гьыъыр регионад Кьухьние.
РД-над Кьухьние генеки гьухьур, Махачкалдид мэриядире гьабгура а тангабыр, гьа участокма дюз гьаъасды коммунальный хозяйствадид гьакьасабыр. Сахьусды кьул, меркездид кьухьды — гвалахас дирибашды илсан йиъи, ва шегьерди ешемишдыбыр ки чалыш дишир йыгара уху1с порядок»,- гьухьур умуд ваъара Рамазан Абдулатипова.
4

Гьанийды ч1елмыхьван, «Устарашды Шегьер» («Город Мастеров») ваъас фикирди йыдкьыд йиъи 15 сен хьурагине, амма сенбыр гьатхы1дыла хъуъ туризмадид Министерствадид иштраква1лихьван йишир кьуле гыргас ми «к1аъды  Дагъыстанад халкьдид культурадид уголок».
Е балад карбыр гьыъыр культура гъилы лихъийыдыла хъуъ. Зы мысъиди гийкьыр ай, культурадыла асыллы йиъид балад мадды гвалахбыр ки. Шууды культура виъиди, гьасад викис ва экономика ки… Дагъыстанада хьибхьусды ер ха памятникбыр бала ид сураа. Гьабыр яхда 6 гьагъзырала бала и. Гьа эккед лаъвалды сахьусды кьул гьувга выъыр йигара меркезди адбишис. Е ваъара а сахьусды  йыхды Кавказди историко– краеведческий музей. Выъыр а сахьусды шиъирмыд Театр. Сиъинбишис, араады, гъарады, гьагур йыгара республикадид гьунарбыр. Е мысга са-сыные са хадкьыр йыгара», — гьухьур Дагъыстанад Кьухьние.
Гьухьур, порядок меркезди ки, ва  региона ки хакьын — сиъинбишды гвалах виъи. Этнокультурный парккалды отдыхад зонабыр, дуруъус йикисды сиъинбишда, дидабар-нинабар ки хынимешихьван, йишир йыгара Махачкалдид сиене районма. «Мидыла хъуънака йишин ки гьаса йикиси. Ес хъывгара ихьды Дагъыстан ва гьадид меркез ва чалыш дикиси гьаъас сиене, кьа1рды кагъата ваъ, илсанашис йыгадкал ва республика ки, Махачкала ки йишин бадана быт1рабыр Россияди»,- гьухьур гьание.
6

10

Официальный гвалахбыр бегьем йишида, Рамазан Абдулатипов РД-над Правительствадид Седри Абдусамад Гамидовахьван ва  меркездид кьухьды Муса Мусаевахьван таныш йишир паркад ермыхьван, устараше гьыъыр ад ювелирный кармыхьван — Кубачидады ва Гоцатлядады, табасаранашды къеденмыхьван, унцукульский усуд кармыхьван ва балхарский керамикадихьван.

РД Кьухьнийды ва Правительствадид
 Администрациедид пресс-служба.