3 июнас Дагъыстанад Кьухьды Рамазан Абдулатипов таныш йишир унцукульдид устарашды «Жемчужины Дагестана»-хьур выставка-ярмаркадихьван, джуду гвалах ваъара ква1ч1уд 29 июнас ва йикисды 10-ды июляйыкьама Махачкалди халкьдид художественный промысламыд Центра.
Республикадид Кьухьды таныш йишир сиене экспозициямыхьван, быт1рана гахъыр гьыъыр ад гвалахмыхда, музеед къуллухчийшихьван гьыъыр суьгьбетбыр, выр предложениебыр, шууна лаъ-хьуъ гыргасди Дагъыстана художественный промыслабыр.
«Ми отраслидере выр йыгара республикадис ва устарашис джва1ршис хайир. Гьад йыхды бизнес йиъи, гьадис кюмег выр йыгад и. Гьыъыр йыгара ачых фонд, кюмег высды гьасад предприятиемыс. Гьыъыр ад карбыр гьекъийкъат йыхдыбыр йиъи, гьабыр маса выс йикиси Дагъыстанала гъайри маддиъне ки гъаъсуруу. Гьадыла йыгъ-йыгъала йыха гьаъас чалыш дишир йыгара гьаъад карбыр»,- гьухьур гьание.
Рамазан Абдулатипова лазимдына хасаб выъыр гвалах ха1р дыъын джигьил специалистер. «Устараше ха1р дыъыр йыгара хъуъ хъуд джигьилер. Гьазыр дыъыр йыгара ц1инды специалистер кьыле выъынид заведениема. Е даже гьазыр диъи гьадид бадана специальный технический колледж ачых ваъас»,- гьухьур Дагъыстанад Кьухьние.
«Жемчужина Дагестана»-хьур выставка йыгыр ад йиъий имам Шамильды 220-сен йишинис гюрене ва Порт-Петровска Махачкала дур лихъихьидид 95-сен йишинис гюре.
Сиене сыт1а выставкади йидкьыр ай кьва1двешдыхъунды унцукульдид устарашды карбыр.
Рамазан Абдулатипов таныш йишир «Город мастеров»-хьур проектед стендехьван, гьыъыр ад гьазыр Дагъыстан Республикадид туризмадид ва художественный промысламыд министерствадире.
Дагъыстанад Кьухьние сагъул-варулбыр гьыъыр меркездид администрациедис ва РД-над Минтуризмадис проект кьуле йыгынис гюре. «Е балад вахт виъий чалышды мисед аллея ваъас хьур, ва гъийгъа, сыт1а чалыш дишидыла шегьердид администрациене ва министерство, проект кьуле руъура а. Миди выъыр йыгара быт1рад ер шегьерди абишис, савдыдыд ербыр ва кафебыр ки ана»,- гьухьур гьание.
Рамазан Абдулатипова хайиш гьыъыр Дагъыстанад меркездид джама1хтида гедкьыр аъ-гьаъ дыкьа хьур рыкъа1 руъуд пробкамыхьде Махачкалди.
«Гъийгъа мэриядире выгыргара а эккед гвалах ра1хъбыр дюз-дюзгин хъыъын бадана, садана дюз хъаъара а 70 куче. Гьадыла саваенди дюз ваъара а трасса Махачкала-аэропорт, хъуъна ка ква1ч1ус дюз ваъара ра1хъ ипподромада, Хушетди вуруъуд ва М-29 трассадыйыхы1р. Гьа сиене гвалахмыра руъура ц1ам джетинвалдыбыр машинмыс, ва за хайиш гьаъара илсанашда гьадихьде гедкьа хьур. Ес йыгара дагъыстанабыр ешемиш дишир быт1рана, гьадид бадана балад гвалахбыр еда лебч1уре а, амма гьаъас мадабыр ки бала йиъи»,- гьухьур Дагъыстанад Кьухьние.
Выставкади генеки иштрак гьыъыр ай Махачкалдид кьухьды Муса Мусаева ва маддыбише.
А. Махмудова, студентка ДГУ
