Рамазан Абдулатипов хаIсил йишир Рособрнадзорад кьухьды Сергей Кравцовыхьван

23 майес Дагъыстанад Кьухьды Рамазан Абдулатипов ха1сил йишир Рособрнадзорад кьухьды Сергей Кравцовыхьван, РИА «Дагестан»-над пресс-службадид хабардихьван.
489516bb6a511f0ee7ad42ff01f19bd7_XL

Региона йиркьыд себеб виъий ЕГЭ-быр йыгын. Рамазан Абдулатипова гьухьури: «Республикади вы мысга гюзет гьаъара ад йиъи, гьис хьурди вы йиркьыда хъуъ Рособрнадзорара гвалах ваъара ка1ч1ур регионмыхьван, ари ха1ч1ур сыт1а хана гвалахбыр, къайгъубыр кьуле гыргара ва макъыетвалды ки ваъара лазимне. Гьа гвалах себеб вишир, сахьусды вы1хьды суруула, е гьа ситуациебыр арыди-джаргыди хъыгыри, ЕГЭ-мыс вылц1ад рышватбыр лехъджешусна. Гьадыла сиенебыр гедкьыр йигара: са мичидид иесси йишин бадана, кьыле выъыр йигара, гьакьалбыр кьуле лешур.
Гьы1лимдид министерствадире ва правоохранительный органмыра балад кюмег выри гьа къайгъу, дердибыр кьуле гыргас. Гьылимдид системадид къайгъубыр быт1рана рыкъа1 иесне.
Россиядид Правительствадид суруула ес эккед сагъвалдыбыр гьыъыр ЕГЭ-быр дюзгинне кьуле йыгыр хьур, амма кьиметбыр бала йирзесдыбыр диший. Гьадыла е мидиъ сес выъыр ай Дагъыстанад Правительствадид седриед заместительвалды ваъасна Толстикова Екатерина Андреевнахда; абыр-ха1я, эдимивалды ад илсан риъи. Гьы1лим лаъ-хьуъ вишин бадана, ц1амды арыды дайраады гвалахбыр гыъыр.
Ихьды ху1кимете мисе йиъи: са суруула гадкьыйне баласдыбишыхда высший образованиебыр а, амма кьул-кьулик кид специалистер адиш, гьабыр кьиметгъана ка диъи. Вы йиркьыдыла хъуъ улихьде гид сахьусды къайгъубыр дюз гьаъас чалыш дикис».
Джуду суруула Сергей Кравцова баракалла выъыр Рамазан Абдулатиповас выдж агъмиш гьыъыр, йыхана кьабыл гыьыр хьур. «Зы Дагъыстанди кит-кине руъуд йиъи. Сен-сыдыла зас ки гьагвара а, ад яшайиш, гьаъара ад мехьтебыр, яслибыр.
Гъийгъад йыгъа ес гьагвара, шууна техникума ва училищема шудаъ ади кьылеваъабыр. Джигьилер гедкьыр а — кьыле выъыйне и гвалахбыр ки алгад. Гьа гьунар йиъи республикадид Минобрнаукадид. Мирджене сахьусды кьул убур йыхы1р йигара магьа1лимеше вылц1ад дарсад кьадарас. Экзаменмыд яц1-кац1 гьац1ыйне, гьабыр сидигыр йигара лаъ-хьуъ кид курсма кьыле хъаваъасна, гьисхьурди хъывыд экзаменала асыллы йиъи магьа1лимешды гьакьал-камалбыр», — гьухьури Сергей Кравцова.
Мира Казиева