Дагъыстанад хьылешды Союзад съезд вишир ай Махачкалди

d8dccf89f5fd9b67507e720bf32aaf5c

Халкьдид организациедид «Союз женщин Дагестана» (Дагъыстанад хьылешды Союз) съезд выгыр ай 23 майес Махачкалди Урусашды театра. Гьади иштрак гьыъыр ай 510 делегатара республикадид шегьерма на районма.
Съездед гвалах кувч1ур йик1иы хъыргыр молчаниедид т1екьикьедыхьван Дагъыстанад Джама1хтид шаир Фазу Алиева, рикьисма кьухьды ришид РД-над хьылешды Союзад.
Хьеликана делегаташис хош-беш ваъара гьалгыри республикадид Правительствадид седриед сахьусды заместитель Анатолий Карибов. «Союз женщин Дагестана» организациедире балад гвалахбыр гьыъыр республикадид хьыле бадана, эккед замха1тбыр сихьир ихьды ху1киметед хьыдынийыхда сиене правабыр йишин бадана. Баласды Дагъыстанад хьыле, гъу1н-гъу1нес йыхы1р, выгълешихьван сакална чалыш диъий республикадид яшайиш бадана, гвалах ваъара сиене джигима, лаъ гьаъара джухьды авторитет халкьдид арыди»,- гьухьур Карибова.
b44c17b2364cf346f81b46043b8f1b0dГьание гьухьур, гъийгъад дагъыстанабишды хьыдылды хъехъреркьара хизан ки увуху1с ва ху1киметед гвалах ки ваъас хеблир. Вице-премьеред ч1елмыхьван, гъийгъа Дагъыстана хьыдынийды роль лаъ вуруъура а ху1киметед управлениеди.
«Гъийгъад йыгъа 7 хьыдылды диъи республикадид Халкьдид Иджласад депутатар, Дагъыстана 3 министр — хьыле диъи, 17 хьыдылды диъи райондид ва шегьермыд администрациемыд кьухьдыбишды заместителер, балад хьыле — регионад идарамыд кьухьдыбыр диъи»,- генеки гьухьур республикадид правительствадид седриед сахьусды заместителе.
Дагъыстанад хьылешды Союзад седриед и. о. Интизар Мамутаевара гьухьур, хьыдылды обществадид индикатор риъи. «Хьыдылды — сахьусды кьул, нин риъи — сахьусды илсан риъи ихьды ха1рнийды гьу1мирди. Шууна гьание тербие вырди джуды веледдис хьура хъуъ, асыллы виъи ихьды обществадид агьвалат. Гьадыла яхда йишир а наят, фикирбыр гьаъас хьур республикадид кьылебырмыд заведениема ришбишды Советбыр, гьала ки гьилине адишды. Организациедид чалышвалды — ришбишис йыхды тербие вын, хизындид йыхды гвалахбыр лаъ хакьын, сагъна, шадна яшайиш дикис гьац1ын, джалахьуъды гьадатмыд культура ха1р выъын»,- гьухьур мамутаевара.
Гьание генеки йик1иы лихьивир республикадид Кьухьды Рамазан Абдулатиповад эккед чалышвалды хьыдынийды лаъва1лид бадана Дагъыстана, гьанийла асыллыва1лид бадана дагъыстанабишды обществадид агьвалат. «Республикадид Кьухьды Рамазан Абдулатиповад инициативадихьван кьабыл выъыр ай закон дидды-нинды бырдж йиъид дюзгинды тербие вын хынимешис.Гьадихьван кувч1ур гьакьдыкьулды гвалах ха1р са хизындихьван, гьадис гюре обществадихьван ва ху1киметехьван»,- гьухьур Мамутаевара.
Гьадыла хъуъ гьади далгыри муниципалитетмыд хьылешды Союзад седриер ва маддыбыр.