Ачыхды ихтилатбыр

sam_1221

И. Г. Ибрагимов: «Райондид центр ихьды хьесым йиъи»
9 февралес МР «Рутульский район»-дид Кьухьды Ибрагим Ибрагимов ха1сил йишир районный центрадид старейшинешихьван.
Гьа ха1силвалды виъий райондид кьухьнийды разива1лихьван, хьуъ гет1ир ай суалбыр Рутульский райондид гьалакьамыд на ва сиясатдид лаъвалдыбыр кьуле, джаргыди йыгын бадана. Гьади иштрак гьыъыр ай МР «Рутульский район»-дид Совет старейшинешды седри Эмин Эминова, ветеранашды Советед седри Сейфудин Маллаева ва мадды, мадды кьа1сды, еш хъишид кьухьды илсанаше.
Сахьусды кьул Рутульский райондид Кьухьние сагъвалдыбыр гьыъыр сыт1а дишир ад акъсакъалашис, гьухьур: «духара ка, шура ка ва хыдиере ка» за вяхда сес выъыр а выхьды ихтилатмыхда хъацусна, выхьды раиемыхда, выхьды къайгъу-дердимыхда, Рутульский районди шыв четинвалдыбыр-ч1утха1рвалдыбыр ади.
«Зас йигара выхьды кьул-кьулик кид ихтилатбыр гьеми мукъа1 ад а1гьвалатдид. Хьурагине йишид ихтилатбыр, гвалахбыр герек диш хьуъ гет1ин, гьамыъ е-ве ка1ч1уси ц1инды джарала хъуъ»,- гьухьури Ибрагим Ибрагимова.
Гьадыла хъуъ далгыри Эмин Эминов на Сейфудин Маллаев. Хьели ч1ел выри гьади иштрак гьаъара ад акъсакъалашис.
Хьуъ гет1ир ай суалбыр:
-Хьидид къайгъубыр, рагъад на багъдис — быстанас гьагъусды джура гьаъасна;
-Ры1къма-кьулума вышед гедене адишды йоква1д;
-Районный поликлиникадыхда на ЦРБ-дыхда вуруъуд ра1хъ экке хъывыъын бадана;
— «Галы» рухьуд ераа хьед гьабгъуд вахбыр ачых хъыъыр йигадид;
-Райондид илсанаше хъуд-хъуна раха1тене налогбыр вын бадана;
-Джуду лазимды къайдыдыхьван ягъа1д ка илсындис ха1р хала тук йикисне;
— «Сиеде» ераа ад типовой мехьтебед строительство бегьем ваъасна;
— Ачых гьыъыр ад садикмыла саваенди генеки маддыбыр ачых хъаъас на;
-Бабаюртовский зонади ад СПК-быр гъилы лихъийир, лаъ-хьуъ гьаъас на;
-Йидкьыд, хъидкьыд мийманашис райцентра гостиница ачых выъын;
— Районный больницади ветеранашис джурад палата ваъас на;
-Районди ад джигьилешис гвалахбыр гьаъас на, гьабишис ул-убур йывхы1сна;
-Му1къа1 ад кьа1сды, кьухьдыбишис ва джигьилешис, хынимешис са парк калды ва я зона отдыха калдыбыр гьыъыр йигад.
Генеки далгыр ай неразивалдыбыр ад калды илсанар, рухьурай, валлагь, «ихьды район къуя гъаъ эхъеп1ир йигара».
Кьул-кьулик кине, быт1рана хъацур далгабишыхда, Ибрагим Ибрагимова ха1рнийды суалас хъывыр лейихды джывабыр, рухьура: джус хабар виъи сиенене къайгъумыкла, дердимыкла са Мыха1д мукъа1 ваъ — хабар виъи сиени Рутульский райондид ад джамагьа1тдид къайгъумыкла ва дердимыкла.
Райондид Кьухьние хьесым-хьесыма гьухьури — гьа къайгъубыр са йыгъадбыр диш ва я сыныйдаа арыди йич1ебыр диш, гьадыла джама1хтид ч1ел са вишир, хыл-хыле выр ва, кьа1сдыбише гьухьудыхда хъадацуйне, шывкиъиди гвалахбыр, къайгъубыр кьуле йикьас.
«Зы хъиркьыр ад йиъи гьемиди район бадана, гьадид яшайиш лаъ хъаъас хьур, райондид центрад усул, хьесым утта-чутта хъаъасна, гьис хьурди зас хъыдгара изды илсан, ер-бына», — гьухьури МР «Рутульский район»-дид Кьухьды Ибрагим Гусейнович Ибрагимова Мыха1д мукъ1д кьа1сды-кьухьдыбишды улихьде.
Гьадыхьван ми гьа1силвалды бегьем вишири.

Къинады САИД,
перевод
Миры Казиевой