Ми ха1фтидис Дагъыстандид Халкьдид Маджлисед Мыха1д райондады депутат Давуд Сулейманов йишири Мыха1 гьа1сил районди дур-ун ад агъсахъал Медет Алимович Ибрагимовахьван. ДР-дид ХМ депутат Давуд Сулейманов йыхьыри гьанийихды хала.
Гьади Медет Ибрагимовад хизындид арыди сукьур, депутатара ва гвалахад загьмедкеш ветеранара гьыъыри балад ихтилатбыр, гьухьури ха1рса-джурад гафбыр.
Сифтене Мыха1д райондид халкьдид яшайишекла ва агьвалатдикла далгыри, гьалаки газ руъуд дурба миди лиджийкьыдид гьукимете кризисбыр йишидыла; гене ки далгыр ай, сугьбет ваъара, хьедмыд ва ра1хъмыд усулмыкла.
Гьади ДР ХМ депутатара хуткури, гьац1ара гьаъара, пенсиебыр ва мадды мисед таликьды выплатамыд усулбыр ки, гьис хьурди са минийис, ветеранас, шууна ийди, сиене районди адбишис ки гьаса йикиси.
Гьадыла хъуъ Медет-бабара гьыъыри ихтилатбыр гъийгъа Дагъыстанди ва Россияди руъура ад политикадид майданады гвалахмыд. Медет Ибрагимов, йиъид кал сифтене ки комсомолод ва коммунистешды партиедид хьурагид активист, сиене миди ад суалмыд дуьзды-къулагъди ана, гьалгыри. Гьание гьыъыри тебрик Россиядид Президент Владимир Путинед гвалахмыс, рухьура — гьа эдеми хьурагине, кьулы гъана, гьу1кимет лап элаады ера хъывгыр, дуьнйадид арыди сифтене, СССР виъид геденды калды, кьухьвалды ва гуджливалды хъывгыр а хьур Россияди.
РД ХМ депутат Давуд Сулеймановара Медет-гыгыйды ч1елмыс выри джуды разивалды, генеки гьаъара гьанийис хабарбыр республикадид парламентед арыди гыргас чалышды гвалахмыд, республикадид кьухьдыбишды чалыш диъива1лид джама1хтис йыха гьаъас хьур, дуьнйа аа-уу а1сла1гь ваъас хьур.
Гьади ветеранахьванды гафбыр бала руъура, депутат Давуд Сулеймановара рагъыри чейбыр Ибрагимовашды хизындихьван ва хуткури сиенебишдаа ки джухьды хизындид агьвалат, ва гьухьури – шывга суал йишийне, шывга четинвалды сада хьур вишийне, джус зенг гьаъ хьур, ва джу, депутатара, мысга выси лазимды куьмег ветеранад хизындис.
Мисед суалбыр ва гафбыр депутатад ва ветеранад арыди балагема руъура сыкьы1р мадай.
Къинады Саид