Депутат хаIсил йишир мехьтебе гвалах ваъад джуды избирателешихьван

SAMSUNG CAMERA PICTURES

 

Джыбра хъуд йыгъа, 1 февралас, ихьды РД-над Халкьдид Маджлисед депутат Давуд Сулейманов ха1сил йишир ай Мыха1д кьва1бхьусды мехьтебед магьа1лимешихьван. Гьади гьанийхьван дыхьыр ай Абеев К.С.- Мыха1д райондид администрациедид кадровый отделед кьухьды, ерлид телевидениедид оператор Н.А. Юсуфов ва ихьды журналистер.
Хьурагине мехьтебед директор Нельсон Султанова джывабыр хъывыр депутатад суалмыс. Нельсон Арсеновиче ихтилат гьыъыр, шыв агьвалат ади гъийгъад йыгъа мехьтебе. Гъийгъа кьва1дхьусды мехьтебе кьыле ваъара а 144 хынхыра (ха1р сыда хынимер бала хъу1дире а, йыкьасды сыда викис хьур а кьва1б сахьусды класс), гьабишис дарс вылц1ара гвалах ваъара а 40-ла балад магьа1лимеше.
Мехьтеб видж йисды виъи, 1970 сыдырма выъыд, сборно-шитовой виъи. Йиц1ыд-ц1ыкьва1д сен йиъи ваъара ад ц1инды мехьтебед гвалахбыр лузур ад. Гъийгъа йисды мехьтеб аварийный ха1ле а.

SAMSUNG CAMERA PICTURES

Гьыъыд ихтилатахьван, мистед сыда ки республикадид проектма адиш гьа ваъара ад ц1инды мехьтеб.
Гьадыла, генеки директорара, магьалимеше хайиш гьыъыр депутатада гьа суалас мааки убур вияъ хьур.
Депутата хуткунбыр гьыъыр, к1аъды хынимешды питание шууна иди, вахтинды вылц1арама хьур коммунальныйбыр, бала име, сагьа1л име хьур стимулирующийбыр, вахтинды вылц1ад-джывылц1ад дулухбыр ва мадды гвалахбыр.

SAMSUNG CAMERA PICTURES

Гъийгъа вылц1ад ху1кимете питаниедис 15 манут са хынхыс гъивыркьара адиш. Дид-нин рази дуруъурдиш кюмег выс хынимешды улесдымыс.
Коммунальныйбыр гьалаки выр а 2015 сыдыд ахира йыхы1р. 16-ды сыдыд выр адиш.
Шесды сыда мехьтебяа 2 хынхыс йыдкьыр ай кьва1дбыр математикада ЕГЭ хъывылц1ади. Мадды предметма йыха диъи хьур.
Гъийгъа балад гвалахбыр джетин йиъи мехьтебе ки, юкьсура ка. Гьадыла хынимешды дидабар ва нинабар магьа1лимешихьван хыл-хыле выр сыт1а чалыш дишир йыгара хынимер бадана. Юксура сыт1ад обращениебыр сигыр, к1ыб-к1ыб собраниебыр гыргара. Амма гьа гвалах гъийгъа гьала ки быш виъи.
Лазимды суалбыр йишийне, депутатара сига хьур джухда запросбыр — чалыш йикис хьур джуула асыллы куьмег выс.

А. Ибрагимов