Август вазырды ахирес Мыха1д Дыла рухъуд ма1хлиди ква1ч1ур ай гьаъара джамаха1т бадана, мехьтебене, садикма ад хынимер бадана кьухьды уфтанды къав гъад площадка.
Сиенебишис йыхана гьац1ара, мистед сыда, мидыла хьуъды сыдырма шудаъды мехьтебед, садикед, даватмыд, джама1хтид собраниебыр гьаъас джиширди къав гъад са ер адишне Дыла ма1хлиди.
Е хуткур ай, шыв гвалахбыр гьыъыр ади, шыв хъаъасди иди, гьа гвалахмыд гъилы-кьулу гъад Абутдулла Раджабовада. Гьание ес мисед ихтилат гьыъыри:
— 2007 сыдыла хъуъ е, ихьды Дыла ма1хлиди ад джамаха1т, чалыш диъий гьеми джигиди ваъас сиенебишис лазимды кьав гъад са ер. Гьасад ер выгара мехьтебед сахьусды, джыбрады зенгбыр рыхы1ди, мадды садикед, мехьтебед мероприятиебыр ади, джама1хтид собраниебыр ади ва дават ади.
Сиенебишис йыхана гъац1ара, шумуб гьасад мероприятиебыр, даватбыр гьаъас джишир ди гьугал, йиз гьугъара.
10 сыдыд арыди, гьа1р са багьанадыхьван, еда гьаъас гьеми гвалахбыр йишир диш. Мистед сыда август вазыра е ква1ч1ури миди гвалах ваъара. Сухьде-сухьде ес хыл-худ вырыхы1ре ква1ч1ури райондид кьухьды Давуд Сулейманов, Мыха1д сельсовет Абдурахман Султанаев.
Абдурахмана йидкьыр выри еде миди сыхы1сды дурбабыр, сагъусды йилаг ва лазимды тахтабыр.
Ула къав гьыъыйне, ихьды джама1хтис йыгара йишир гьыъыр гъара а-у масбыр ки.
Занна гьемиди гиме гид джигьилеше гьыъыр звонок Калаев Калахда на гьанийды шу Абдусаламыхда. Гьа йыгъа мадана гьа шуба1ше сигыр ес 2000 шлакоблок, цемент, сец1 ва лазимды материал. Гьамыъ гьагвара ва1с, шудаъ уфтанна йшир ади, усыл йыбкьыр ади ми ера.
Са йыгъа яхда йиркьыр ай ихьды Дагъыстанад Халкьдид Иджласад депутат йишид Нурахмед Магомедов. Миди гьаъара ад гвалахбыр гьагуйне, гьание сигыр ес мидиъ джиле гьаъасды отсевед камазбыр, сетка ва гьеми йыгъырма выс хьур а бетон ки.
Генеки манутмыд суруула ес выр ай кюмегбыр мисед инсанаше:
Давуд Сулейманова, Нурахмед Магомедова, Абакар Султанаева, Абдурахман Султанаева, Курбан Гусейнова, Нельсон Султанова, Байрамбек Магомедова, Алмадин Абасова ва мадды ихьды юлдашеше.
Генеки зас ихьды устарашды суруула, ихьди джама1хтид суруула ваъас йыгара эккед сагъул ихьды гьемисед инсанашис:
Эмин Магомедовас, Балалай Гаджиевас, Пулат Алиевас, Неби Небиевас, Абубакар Махмудовас, Исмаил Халиловас, Серкер Абдулаевас, Эмир Гусейновас, Низам Гюльахмедовас ва сиене хыл-худ йывхы1д джигьилешис.
За изды сурула миди ваъара а ихьды ерлид кьвабырды са уфтанды былах.
Ес йишийне йыгарай, сахьусды кьул, гьимиди йыкьа1 гид телирди ус хъуъ хъыъыр, йишихьвна, трансформатор ки, генеки йыгара гьыъыр инсанар сыдкьысды ербыр ва йыхы1с йыгара ширбыр.
РS. Джама1хтида культурный отдых гьаъас йикисды ер бегьем вуруъура а. Гьамыъ инсанашды бырдж — гьа ер мысга темизне хывкьын, маъ-хъаъ гьухьун руг-ч1ы1х саъабишде, гимикла гут1 дживикисне, мысга хывкьыр йыгара темизвалды, гъара, ара йыдкьыд мийманаше гьухьусна, миди халкьдид арыди порядок аниъи хьур.
Насир Ибрагимов
