Ваъара а садик

Лучекды мехьтебед бейде ад джыгыди му1къы1д активистеше ваъара а к1аъды хынимешис садик. Гьади йыхьыд гедене, зас гьац1ыри: мехьтебе балад сыдырма магьа1лим йиъид ва директорвалды выъыд Бахтияр Майсаровад фикирдихьван, выъыр месла1гьа1т джигьилешихьван миди ад помешениедикла хынимешис садик ваъас хьур.Гьадыла хъуъ Бахтияр-магьа1лим йыхьыр а Мыха1д райондид кьухьды Ибрагим Ибрагимовахда ми месла1гьа1тед ихтилат гьаъас… «Райондид кьухьние ки, - рухьура а Бахтияр-магьа1лимере, - месла1гьа1тес выри разивалды ва гьухьури – кедиъ, гьа йыхды гвалахбыр гьаъара, джуду сураа ки сиене куьмегбыр выси хьури гьа гвалах кьуле выгын бадана…» Са вазырыла балад вахт вишир а - гьади джегьилеше, йик1 сихьир, гвалахбыр гьаъара ад: аъ суруула масбыр ва къавбыр лыт1а гьыъыр, уфтанды рангымыд ширбыр ки йыхы1р; тукад синбыр сиъене джигима йыгыр а, люстрабыр ки кит1ир; рак-гъу1ль пластикадид лихьир а; кухниди ки ц1инды печь сивхьир а; гьади сиени джыгыма руъуд тукмыд синирмыс джурад автоматбыр лихьир а, тукад шит лихьир... Са вазырды арыди миди йыгыр а лап уфтанды к1алыб ва гьади гвалах ваъад джигьилешды ки нийатбыр йиъи - джуды хынимер дуруъуси садике, ва му1къа1 генеки умуд а илсанасиш йикьаси хьур бюджета гъад гвалахбыр. Зас гьухьус йыгара: аферин, баракалла миди ад илсанашис, джуьхьды меслагьа1тес ва гьу1рмитдис! Гъийгъа гъабишды гвалах лювшус йикиси ес, сиени районди му1къма ад илсанашис, усул на.

Памятник цIине хъаъара а Лучек му1къа1 хъаъара а ц1ине гьади гъад да1види дыркьыд йигитешис памятник. Ми гьапхы1д март вазыра Мыха1д райондид Административный Советед иджласа выр ай сиене райондид сельсоветешис указание - гьа1р са му1къа1 ад мисед памятникмы ва обелискмы уфтанды к1алыб хъыга хьур. Лучекды му1къу1д сельсовет Сафар Сафарова, лап хьура гидбишды арыди кине, гьа указание кьуле гыргара а.

МуIкъаI ад кIаъды хынимешис - дуьлхъесды майдан

Лучек му1къу1д арыди, джуьхьды парк гид джыгыди, гьаъара а джулды хынимер дулхъесды майдан. Гьа гвалах ваъара а му1къу1д сельсоветед администрациедид кьухьды Сафар Сафаровад чалышва1лихьван. Гьание гьу1киметед программадик кивир джуды гьа1рзе, йыхьыр гьадид джибра ва гъийгъа Лучек му1къу1д арыди бегьем вуруъура а хынимешды майданад усул. Зы гьади йыхыд гедене, ц1амды гвалахбыр маданийиъий - гьади йит1кьыр ад хынимер дуьлхъесды карбыр сыт1а хъыъыр йыгара ай. Аммани му1къа1 ад джулды хынимер гьади, сиени сыт1а дишир, дуьлхъере ай: гьабишды шадды унмыд сесбыр зас лап кьабыл йишири, ва гьадыла гьухьус йыгара: «Сагъул ми гвалахбыр кьуле гыргад Лучек му1къу1д кьухьды Сафар Сафаровас!»

Къинады САИД