Ихьды республикадид меркезди ад Дагъыстанад гьашыкь Сулейман Стальскиед дур гъад парк дюз-дюзгюн хъыъыр ачых хъыъыр а.
Ачых гьаъад вахтинди гьади иштрак гьыъыр ай Дагъыстанад Кьухьние Сергей Меликова, «Иман»-хьур фондад кьухьние Фируза Керимовара, Махачкалдид мэре Юсуп Умавова, ДР-дид писателешды Союзад седрие Марина Ахмедовара ва мадды сес выъыр ад мийманаше.
Парк ачых гьаъади Сергей Меликов гахъыри гьади йыдкьыд хынимешды шикилмыхда, плакатмыхда, «Ватан бадана гьуIмир выд йигитешды хынимер»-хьур фотовыставкадыхда ва мадды кардымыхда.
«СВО-дид зонади ихьды эскереше аIгьтиет гьыъыр хынимеше сигыд кагъатбыр на шикилбыр хъиере масалмык кид даскыдыхда. Эскеред гьамыра йикIик рывыр кахара, йыха руъура гьабишды фикир-хиялбыр.АIгьтиетне гьабыр хъуъ хъаъара, маддыбыр цIиндыбыр хъийис хьур, ихъихьир джухьды кьутума. Гьадыыла ихьды кьаъдыбыр бала гьакьаллыер диъи», – гьухьур Дагъыстанад Кьухьние.
Хьели ки цIинды парк ачых гьаъад арыди Сергей Меликова, Фируза Керимовара, Юсуп Умавова и Марина Ахмедовара лихьил бычIбыр Сулейман Стальскиед памятника.
Иштракчийшды улихьде гьалгади Сергей Меликова эккед кьимет выри уфтанна хъишир ад паркас на бульварас.
«Арикид сахьусды уфтанды ераа Махачкалди, инсанашис не меркездид мийманашис мысга дыкьас йыгад джига, эхир ки лаазимды дур гъад, бала бытIрад йишир а.», – гьухьур республикадид кьухьние.
Сергей Меликовды чIилмыхьван, йыхды кар йиъи, Сулейман Стальскиед юбилеед Сыда шегьердид йыкьдыхуда дур-ун ад чIилды устадад дур сыхыIр а хьур парка.
«Шаирер дуруъура хаIрса джура.Дыркьыдыла хъуъ сасабыр йикьире гьабишды шиъирбыр ки, маддыбишдыбыр гьуIмирдыхьван руъура. Джикьир аргыр а ихьды Сулейман Стальский ки. Джигара йиъи, гьанийды гьуIмир ки кьуляа джубра дагъамды вишир хьур. СоветхуIкиметед шаир ва публицист Николай Тихонова ихьды дур ад шаирекла гьа вахтинди мисе кихьир ай: “Балад карбыр гьагур гьа эдемиес гьаасад, мадды гьамыра аа хиесий, амма гьанийда йишир лаъ хъаIчIус гьа джетинвалдымыыла джуду гьуIмирди”.
Ихьды зурбад гьашыкьас хьурагине фикир ки адиший, джудаа инсанашды йикIе аIчIус йикис хьур ва джуду ун йикис джус джацIад урус чIилыла хьуъ выдж гьацIас хьур ихьды эккед хуIкимете балад миллитмыс.», — гьухьур регионад кьухьние.
Хьели Дагъыстанад Кьухние ихтилат гьыъыри халкьдид шаиред гьуIмирдикла:
«Кьалам хадишне гвалах выъыд, Сулейман Стальскиеда йишир гъеблир ва бытIраана гьаъас къалинды фикирбыр. Эккед гьакьалдире Стальскиекла гьыъыр гьилине адишдыкалды шаир, выдж ад эхирдис лейихды. Гьадыла ес хаIрнийис гьа йиъи сахьусды лаъ хъуна увга выъыд джуду вахт. XX-хьусды векдид Гомерды шиъирбыр ми вахтиндис ки лейихдыбыр йиъи, гьамыъ ад гьакьасабырмыд йыкьаI кихьибыр ка, шийидерне диъид гъийгъа йе-ваI. Гьамыра йес хъывгара ваъара ихьды Ватан».
Къутливалдыбыр меркездид инсанашис ва йыдкьыд мийманашис гьыъыр Юсуп Умавова ки.
«Республикадид кьухьнийды Сергей Алимович Меликовад кьарарахьван мистед сен гьыъыр а Сулейман Стальскиед Сен не. Гьадыла Махачкалдид администрациедире эгъет1ир кьарар табатаа адга гьаъас хьур шаиред дур, цIине хъыъыр Сулейман Стальскиед дур гъад парк, ари йыхаI гьыъыр хьибыд комплекс.
Эккед замхаIтбыр диъир уфтанна дюз-дюзгин выъыр бала бытIрана вишир а инсанаше кьаIчивалды сихъвиргад зона Махачкалди…», – гьухьур мэре.
Парк ачых гьаъад арыди Юсуп Умавова «Иман»-хьур благотворительный фондад кьухьнийс Фируза Керимовас выри знак «Почетный гражданин города Махачкалы»-хьур.
Бегьем дуруъуд вахтинди ачых гьыъыр цIинды фонтан.
Йидкьыд мийманашис ки гьазыр гьыъыр ай уфтанды концерт.
Насир Ибрагимов
