Базарды йыгъа, 13-хьусды октябрес, зы, «МыхаIбишды цIинды хабарбыр» газетед суруула, ва Насир Юсуфов, райондид телевидениед кьухьды, дыхьыр ай хашкурди ваъас СВО-да кьаъды 20-ды йыгъад отпускади хъиркьыр ад Алиев Ниямудиныхда. Ниямудин МыхаIаIды Алиев Пулатды на Тюмен-ришид кIаъдыбыйды дух йиъи. Ихьды везифе Пулат шуд хала дыхьын — духарыс хош-беш выъын, къутливалдыбыр гьыъын гьанийис Дагъыстанад Халкьдид Йигит йиширадыла.
Алиев Ниямудин Пулатович гьухуд йиъи 18-хьусды мартас 1980-хьусды сыда МыхаIд районди МыхаI муIкъаI.
ЙицIды сыда кьыле выъыр МыхаIбишды 2-хьусды мехьтебе 1996-хьусды сыдыы йыхыIр.
Мехьтебяла хъуъ Ниямудин кьвунды сыда (1998- 2000 сенбыр) армиди йишир. Гьади гьа ай танковый войскама — са сен лийир Гусиноозерск шегьерди Бурятиеди ад, ва са сен ки армидид йишир Чечниди. ЭскерваIля хъиркьыр хала старший сержантад звание ана. Армидыла хъуъ Ниямудин миди-тини къазамишбыр гьаъара аъ-гъаъ йиъий.
9-хьусды декабрес 2012-хьусды сыда Ниямудине китIир контракт Каспийский флотилиеди ад морской пехотадид джурад полкахьван. Гьади гьа ай эскерне каIбчIума Украинади специальный военный операцие. СВО каIчIуд сахьусды йыгъаала хъуъ, 22 февралес 2022 сыда, Ниямудине иштрак гьаъара ад йиъи даIгьвиди. Гьади мадана гьа джуды юлдашешихьван сытIа сигыр ай Бердянск шегьерди Запорожский областе ад.
Гъийгъа Ниямудин, даIгьвиди иштрак гьаъара, анийиъи Бахмут шегьерди. Гьа йиъи сапер — гьабишды везифе виъи раIхъ ачых выъын ихьды штурмовикешис хьуъ диъиди минамы лиджитхьун бадана.
4 сентябрес мистед сыда гьади осколкамыра яраллы гьыъыр гьанийды хыл на гъил, 5-ды йыгъа ай госпитале Курдюмовка хьур муIкъаI ДНР-ди. Госпиталяла хъуъ кьаъды отпуска выр хала сихъигыр ай. Миди Дагъыстана хъикьасды вахтинди гьанийды командованиедире хайиш гьыъыр ай республикадид кьухьдыбишда гьанийис вияъ хьур Дагъыстанад Халкьдид Йигитед хаIдий. Республикадид меркезди хъиркьыйне 8-хьусды октябрес Махачкалдид Администрациедире Ниямудинис выр ай Дагъыстанад Халкьдид ЙигитваIлид къизилед хаIдий не диплом гьа званиедид.
Гьадыла хьурагине Ниямудинис выр ай мадды наградабыр ки: медаль «За доблесть» ва медаль «За СВО».
Джухьван хаIсил дишид арыди Ниямудине балад ихтилатбыр гьыъыри даIгьвиди ад агьвалатакла, джуду юлдашешикла ва мадды гьакьасабырмыкла. Хуткуйне, камды-кесды ама, гъийкьыд ярах хама, хьур, Ниямидине мисе гьухьур: «Шешин камды-кесды адиш, шыв йыгарди, сиене а — обмундирование шууды ва шудаъ йыгарди, снаряжениебыр лаазимды, шудаъ йыгарди улесдыбыр хаIр са джура, ярах ки а йыггадыхъун, сиене эскерешихда а лазимды экипировкабыр ки…».
Шудаъ ваъара джу умуд Россия гъами викис украинадид нацистешыы, хьур, хуткуйне, йигитере йигитед дживаб хъывыри: «…Россия, джу 100 % ваъ, миллион % вылцIара гъаалиб викис хьур!». Гьемисед зурбад йикI ад ихьды йигитеше иштрак гьаъара а даIгьвиди.
КьаIчIи-бизар дишме, хъыджыхьыр, сукьус хала йыгарама, хьур, хуткуйне, Ниямидине фикир ки джывыъыр джываб хъывыр: «…Шууна йиъи зы субкьуд миди, изды юлдашер хьура ад гедене, гьабыр зас шубаI дишир а, зы гьабишис ки гьааса йиъи…». Ва мадды балад ихтилатбыр гьыъыр Ниямудине йес, меселла, рухьура ай, эккед кюмег вылцIара СВО-ди адбишис благотворительный гвалахмыд сураа ки. Руъура джваIршихда посылкабыр ки ва телебийшды кагъатбыр ки, гьабыр джваIр сытIа дишир кьыле гьаъара, гьадыла эккед сагъулбыр гьаъара ай сиенебишис Ниямидине джуду суруула ва юлдашешды суруула.
Йе дыхьыд джубра хъуд йыгъа Ниямудин хъаIрхыIри хъуъ джуду шубаIшды бейде даIгьвиди ад.
Эккед сагъул виъи Пулат шус на Тюмен ришис гьасад уфтанды тербие выр кьухьва гьыъыд йигит дух. Алиев Пулатды ва гьанийды хизындид мысга хуIрмет ад виъи МыхаI ки ва районди ки, джваIр ки, джухьды хынимер ки бала эдеб-гьея ад, эдемивалды ад, замхаIткеш инсанар диъи.
Ниямудинис не гьанийды юлдашешис сагъна-шадна ва гъаалиб дишир хъидкьыр дид, нин шад даъас къисмат йиший.
Ихьды Йигит генеки ухуIй джуды Эскерхан гыгые кубаа гъади хаIр хылис гьаъад Аллагьас дилегмыра сагъана, шадана сиене Россиядид эскерешихьван сытIа, гъами дишир душманашыы халма хъидыкьый хьур.
Б. МЫХАIДЫ
