30 сентябрес МыхаIд райондид джамахаIт КъыIрыы маIхлиди ад сырымыы ягъмиш вишир ай гьанкьудис — гьади гьа йыгъа кирхьере ай СВО-ди йикьид ихьды МыхаIды эскер Идрис Султанаев.
2023 сыда мыхаIбишик, дуруъус йыгара йишид добровольно иштрак гьаъас Украинади гыргара ад спецоперациеди, кинийиъий ва МыхаIд сельсоветед седриед заместиетель Идрис Султанаев ки.
Султанаев Идрис Султанаевич гьухуд йиъи 2-хьусды майес 1964-хьусды сыда МыхаI. Мыйеб класс лаабтIа выъыйне 1980-хьусды сыда кьыле ваъас каIчIур Владимир шегьерди ад сельскохозяйственный техникума «Зоотехния»-хьур факультете.
Техникумала хъуъ Идрис ай армиди (1985-1987-хьусды сенбыр), эскер йиъий джурад десантно-штурмовой полкад Бурятский АССР-ди ад Кяхта хьур шегьерди. Армида хъиркьыр старшиныед званиеди ана зенитный установка орудиедид командир йиъине.
Армидыла хъуъ балад джигима гвалахбыр гьыъыр — СВО-ди руъуд вахтинди йиъий «Сельсовет Рутульский» администрациедид кьухьнийды заместитель. Гьадыыла саваенди гьа йиъий 4-хьусды курсад «Водные ресурсы и морская акватория»-хьур факультетед студент Дагъыстанад хуIкиметед сельскохозяйственный академияди.
МыхаIд райондид джамаIхтире эккед кьимет выр ай Идрисе выъыд йигит гвалахас — хад йыхды гвалахахда, ешдыхда гаджакьыр, са повестка ки адишне, выдж, джуды йикIяа, добровольно йыхьын даIгьвиди Ватан бадаана сахьусды лаъ хъуд гьунар йиъи гьанийды, хьур.
«Зас балана йыгара ай хайир выс ихьды Ватандис ва йикIире рухьурай — куьмег вияъ хьур Ватандис гьеми джетинды вахтинди. Эгер йикIире гьаса рухьура йишийне — гьадихда хъацур йыгара. За гьа гвалах выъыр, ва зы гьа кардыы шад йиъи.
Гьамыъ зы анийиъи Донецкий Народный Республикади, полигона ярах сийтес хаIр даъара а, гьазыр дуруъура а даIгьвиес. Сиене йыха йикиси, йе гъаалиб дикиси! Слава Россиядис!», — мисед чIелбыр гьухьур телефона Идрисе еде.
Гьадыыла хъуъ кIаъды отпуска выр Идрис хъиркьыр ай МыхаI. Отпуска лаатIур хъаIрхыIда хъуъ са арыдыла ка Идрисе джуду бегедебишис джукла хабар хъыджвылцIара йишир. Сур сен йишир Идрисды хабар-этер адишды.Эхир хъибкьыр мисед писды хабар — Идрис йикьир, хьур, даIгьвие иштрак гьаъара ана ва гьанийды майит ахъыгыр а, хьур.
Ихьды атабабыйше рухьуд йиъий — Элигъание йыхды инсан джухда, джуды бегеде гыргара, хьур. Идрис йыхды инсан йиъий хьур сырыы гъад сиенебише рухьура ай — йикI ачыхды, хуIрмитдид, эдемивалды ад, гьидылана гиджичIед, са инсанада ки «ваъ» хьур джухьуд, джуду бегеде куьмег ви хьур йыдкьыйне, гьаасад йигит дух йиъий.
Райондид кьухьние Давуд Сулейманова гьади сырыы гьухьур ай, сабыйды МыхаIд маIхлиди ад рыкъыI Идрисды дур сыхыIс хьур.
ДжамаIхтид дугьаIмыхьван на пограничникешды салютахьван рыкъаI ийир Йигит Идрис ти дуьнйадыы.
Джуды сыр Нурдид йикий! Аллагьара раIхмет выъый!
Б. МЫХАIДЫ
