27 сентябрес 2024 сыда МыхаIд районди ад ЦСОН идаради йиркьыр ай эскер Ахмедов Шахмур Абдурахманович, бегедене хъиркьыр ад Курский областе даIгьви ад джигида кIаъды отпускади, ва гьанийис йыгара ай гьа идаради йыхьыр гаIш-мыкь ваъас Центрад кьухьнийхьван.
Центрад директора Османов Амрах Ниязовиче сахьусды кьул эккед сагъул-варулбыр гьыъыр эскерис йигит гвалахмыс гюре Ватан бадаана гьаъара ад.
Ахмедов Шахмур гьухуд йиъи 14 январес 1997 сыда Гельмец муIкъаI МыхаIд районди ад.
2014 сыда кьыле ваъас каIчIур Амурский медицинский колледже Благовещенск шегьерди ад, кьылевыъын лабтIуйне йыхьыр ай армиди эскерваIле.
2019 сыдыыла хъуъ Шахмура контракт китIир эскервалды ваъара ай Белогорск шегьерди. Гъийгъа ки гьа гьади мара эскерваIле прапорщик йиъине медицинский службадид.
СВО-ди ад вахтинди гьанийис выр ай хьуланды хуIкиметед наградабыр: медаль «Жукова», медаль «За боевые отличия» ва медаль «Воинская доблесть II — степени».
Чей ки рагъара идарадид кьухьнийхьван гьаIсил йишид арыди СВО-дид иштракчиере ачыхана ихтилатбыр гьыъыри джуду эскерваIликла, шууна иди даIгьвиди, джуды юлдашешды йигитваIлид гьакьасабырмыкла.
РыкъаI ахъахади эскер ЦСОН идарадид кьухьние Амрах Ниязовиче хайиш гьыъыр Шахмурда хъивияъ хьур дидис, нинис джуду суруула сагъул-варулбыр тербие выр кьухьа гьыъыр а хьур мисед йигит дух ихьды хуIкиметес.
-Йе мысга связа гъанидиъи ихьды эскерешихьван, мобилизовать дыъыр ад МыхаIд районда, — гьухьур Амрах Ниязовиче.
Гьадыла саваенди, Османов Амраха къисмат гьыъыр Шахмур Абдурахмановичес, бегедене маа джуду еринды СВО-ди хъуIгъуIсды, хала хъикьас сагъна, шадана ва гъаалиб дишир ихьды эскерер.
Б. МЫХАIДЫ
