Дагъыстандид кьухьды Сергей Алимович Меликов 17 сентябрес йыхьыр ай Дагъыстанди цIинене ачых гьаъара ад центра, эскерер хаIр даъасды.
Гьа центраад гвалах выгыргасды виъи Дагъыстандид хуIкииметед технический университете.
Гьади кьыле ваъасды йиъи фуланды программамыхьван эскерер гьазыр даъад: студентешикла дикис сержантар, рядовоер, матросар. Гьадыла саваенди запаса ад эскерер ки ц1инене хаIр хъадаъас.
МисягьаIтди йыгыр бегьем йиъи конкурсный отбор ва кьабыл дыъыр а 33 инсан гьади кьылебыр гьаъасды. Мирджед конкурс йикисды йиъи октябрялады декабря йыхы1р, гьа конкурсаала тиниъ ледшусды йиъи 66 инсан.
Гьабыр сиене сытIана кьыле ваъара каIчIусды йиъи мирджед сыдыд 1 февраляла хъуъ.
«Эскерешды кылевыъынид центра са эскерваIлид гвалахас диш гьабыр хаIр даъасды, гьадыла саваенди гьадикла йикисды йиъи гьаасад джигаа, гьакъикъатды йигитваIлид тербие ад духре гьазыр даъасды. Серегей Алимовиче эккед сагъулбыр гьыъыри Россиядид Миноборонадис ва Минобрнаукадис гьемисед эскерешды кьылевыъынид центр ДГТУ -е ачыхасды меслягаIт кьуле гыргара а хьур ва сагъулбыр гьыъыри Университетед кьухьдыбишис гьа центрадид гвалах гъилыы-кьулуу гъана лейихене кьуле выгыргара а хьур. Гьание гьухьури: «Эскерешды кьылевыъынид центр университете ари ачых йишин — сиене коллективед гьунарбыр йиъи. Зы йикIидана инамиш йиъи эскерешды кьылевыъынид центракла ва1 сиене сыт1а ари хана чалыш дишир ваъаси гьасад ер — герексен джигьилешис йыхана дарс вылцIад, йыхана тербие вылц1ад, быга лазим йишийне йигитеркал сиене, са дишир, гъуIн-гъуIнес йыхыIр ватан увуIхуIсды. Гьааса йишийне, гъийгъа Дагъыстандады джигьилешис ачых выъыр а раIхъ эскерваIлид гвалахас лейихене хаIр даъасды.
ХуIрметли юлдашер! Гьеми центр ачых гьыъын за ваIс къутли гьаъара. Мегем гьеми центракла йес-ва1с мысга йыхды унбыр йыхы1й. Гьади кьыле выъыд духрешды йигитваIлид дур-ун дуьнйады йиший!»
Гьадыла саваенди Сергей Меликова гьухьури, генеки миди кьыле выъыд телебийшды гъил гъигъе йикиси, гьабыр гьилига нагьакьваIлид рыкъаI дикисдиш ва ватан увуIхуIслды тербие лювшуси.
Генеки гьухьус йигара, хьур: «Дагъыстанабыр гъуIн-гъуIнес йыхыIр мадды Рссиядид регионмадыбишихьван – Карелиядады Приморский края йыхыIр, йигитешекал ватан увуIхуIре чалыш диъи специальный военный операция гыргара ад зонади. 12-ды ихьды эскерес выр анийиъи кьухьды хуIкииметед наградабыр – Россиядид Йигит. Гьабише гьаъад подвигмы сиенебишис гьаламат йиъи ва сиене Россиядид джаIмахтид сураа эккед сагъул виъи. Амма, гьа подвигмыд кьиммет балана балад виъи, сасад гедене сагъна гихъийтхьусды чара вуруъур диш», – гьухьури республикадид кьухьние.
Дыркьыд Йигитешды хатирес сиенебыр са тIекьикьеды гийтхьири.
Зарема Исрафилова
