Базарад йыгъа, 16 сентябрес, Дагъыстанад кьухьды Сергей Меликов йыркьыр ай гумшиди ад Гьахтыбишды района, гакьас хьур шыв хаIле ади луза гьыъыр ад ва луза гьаъара мадад туристешды, кьылебырмыд, больницадид, культурадид, гьамыхьван сытьа кьваIд сен хьурагине выдж йыркьыр гахъыд объектбыр.
Гьадыла хьурагине август ваз кувчIуд арыди сабыйды гвалахад иджласа Сергей Меликова выр ай чиновникешис суал, гьидыла иди Гьахтыбишды район Сулейман-Стальский районкалды дишды, эгер кьвундысинды райондихда виъид раIхъ са виъине йишийне, ер-юртбыр сакалдыбыр ине йишийне ва гьааса йишийне йис иди Гьахтыбишды район гьалаки мабад ирды зонади ва лаъ-хьуъ дишды мидийкьама.
Сергей Алимович таныш йишир Гьахти муIкъаI ад къаладихьван, лувза выъыр ад 1839 сыда. КьваIд сен хьарагине миди йыркьыд вахтинди гьухьур ай, дюз-дюзгин хъаъ, хьур гьа таарихдид памятник.
Гьамыъ гьа цIине хъаъад проект кьуле гыргара а фондара, ерлид инсындире джуды садакьа-нафакьа ка.
ЦIинды комплексед еринды гьаъас йыгара а: кьалба йыгыр усул выгыргас аъ суруу ва гъаъ суруу гид ермы, гьаъас гьади парк эккед мачхулатад майдан хъуд, гьада хаIле шарбыр сигас йикисды, музеед комплекс ки луза гьаъас, дюзгин хъаваъас йисе вишир ад килисе ки, гьаъас цIинды ресторанбыр, кафебыр, туристешды центр ва бытIрад лывтIа выъыд савдымыд ер, ерлид эвелды карбыр маса высды.
Гыргара ад гвалахмыд ихтилатбыр гьыъыр проектный кампаниедид директора, архитектора ва реставратора Ирина Агафоновара.
Гьахти республикадид кьухьды тааныш йишир сабыйды мехьтебехьван, цIине хъаваъара ад кьваIдхьусды хылис.
Гьадыла саваенди Сергей Меликова лихьир бычIбыр луза гьыъыр ад мемориалаа памятед Багъди, СВО-ди иштрак гьыъыд йигитешис Гьахтыбишды райондады. Миди, улихьде чул ид джигиди, гьамыъ кинийиъи кьиямат хукбыр ва луза гьыъыр а специальный военный операциеди иштрак гьыъыбишис мемориал, гьыъыр гьадыла саваенди йыхьды мачхулат гьаъас йикисды ербыр ки.
Гьади Меликов гьаIсил йишир эскерешды дидабашихьван на нинабашихьван, хъацур гьабишды къавгъу-дердимыхда.
Республикадид кьылевыъынмыд министр Яхъя Бучаевахьван сытIа таныш йишир аграрный колледжед гвалахахьван, гьазыр даъад муIкъмыд хозяйствамыд специалистер, духтурар, аграномар ва сварщикер. Колледж лапIтIубише гвалах ваъара эккед хьуланды предприятиема: «Алияк», «Полоса», «Алвиса» ва Дербентский завода игристый чахырбыр гьаъад.
Гьахти 15 сен йиъи лувза ваъараъад цIинды больница. Гьа бегьем дишды зданиедыхьван тааныш дуруъуд гедене, здравоохранениедид врио министр Ярослав Глазова ихтилат гьыъыр Сергей Меликовас, гьухьур гьанийде, гъийгъады йыхыIр зданиедид гьазырвалды виъи 78%. Госпрограммадик кид кал, бегьем ваъас хьур а больница ари сиене лаазимды оборудование ки сихьир 2026-2027 сыдырма. Гьадыла хъуъ кьабыл даъара каIчIус йикиси едед инсанар цIинды корпусма, хъихир гьадиъ сиене отделениебыр.
Б. МЫХАIДЫ
