Гьахтады шикилбыр рыхыIд устар, эколог ва «ЦIинды дуьнйа» газетед штатак кидишды корреспондент Юсиф Кудратович Саркаров РФ-дид фотохудожникешды Союзад членваIле керъир а. Гьание йыхыIр ад шикилмыс, ягъмиш выъыр ад шикилбыр рыхыIд устарашды комиссиядик кидбише выр ай эккед дуьзды кьимет. Гьанийды шикилбыр гьухьусна бытIрадбыр йиъи, хьур, гьасаб гьыъыри конкурса сигыр ад шикилмыд арыди. Гьа гвалахбыр гьанийды, валаетди дур ад комиссияди керъинвалды йе гьанийис къутли гьаъара.
Ми ихтилатахда ве гедкьын бадана, гьухьус йигара, 1990-хьусды сыда декабрь вазыра Курск шегьерди шикилбыр рыхыIд устарашды сахьусды иджлас вишир ай.
Ихьды хуькимете ад шикилмыд устарашды ари хад къалфыдик кини диъи кьвуIнды гьагъзырахъаъ ки балад инсанар. Гьа организациедид филиалбыр 47 джигыди ани йиъи.
Организациедид сахьусды чалышвалды виъи — шикилбыр агъахад устарашды гвалахахда лаъвалды вишин, гьа творчестводид рыкаI ад инсанар бала дишин ихьды ари хуькимете ки ва мадды хуькиметма сытIа. Генеки, гьа организациедире хываI лешур ани йиъи шикилмыд устарашды авторский правабыр ва гьабишды интересбыр ухуIс хьур.
Гьадис гюре гьабыр кид-кине ягъмиш дишир, гыргара шикилмыд выставкабыр, фестивальбыр, конкурсбыр ва кьухьды иджласбыр джуьхьды арыди. Гьадыла саваенди гьабише фотолюбителешды движениедис сиенедид сураа куьмег вырцIара, ва артухды хурметбыр на куьмегбыр гьаъара гьаъ пешидид рыкIа аIчIур ад хынымешис.

Зарема Исрафилова