Мидыла хьурагинды газета е гьугълумыд, дегиш вуруъура ад гьавадид ихтилатбыр лийир ай. Гьади е гьухьуд ка, ихьды МыхаIд районди маа лугъур ай гьаатхыIд вханниед йыгъырма. Ми хылис садаки джулгъуд ка суткIады 27-хьусдыла 28-хьусды йыхыIр джатIур гьугъара йишири сиене районди. МЧСед службамыра хьурагинды йыгъырма тапширмир ки дыъыр ай инсанар, гьугъалбыр йикис, хьур, амма мисе балад гьугъалбыр йикис хьур инсанаше фикир выъыр адиший, умуд выъыр цIамды гьугъла, баладбише укь ки кине сийир ай.
Амма ми хылис джатIур йыгъа-выше лугъуд гьугълара эккед зарарбыр, зиянбыр выр ай райондис, гьыъыр джетинвалдыбыр инсанашис. НацIур Самур ва мадды эккед не кIаъды мирибыр лыIхаI-мычIахъа йишир, садаки мидыла хъуъ джишидкал, бала йишир, ыIхъджыйхьыр къирхыма гъаъ игъитхьур ай. Гьагвара-гьагвара нацIурыхда цIинды адишды хылибыр йишир игъитхьур ай гьучIелмы, езелмы ва хъитхьур бегеде хад халмыхда ки, рыIкъмыхда машинмыд.
Балад зиянбыр выр а раIхъмыс — КIаълида хъуъ вуруъуд Шиназ муIкъаI раIхъ гевир, машинмыда гыхъыIйгъаIс руъура адиш, Микик муIкъаIа Джиных йыхыIр машинмыд гыйгъыIн гьатIур а, йишир рыкъыIд гьудкьунбыр, летIир раIхъбыр юхурмыра, кьвабырмыра ва дарымыра. Сиене сытIа гийтхьур чIир йишир а 10 километри рыкъыIд. Къанна хьибды муIкъуIхда машинмыд раIхъ хъумаабдиш.
Бала вишид нацIурара, банааласаъды юхурмыра лука гьыъыр а телирды тукад усбыр синбыр ки хана, сасадбыр луджукур хъагъур мада. Гьадис гюре йаIкв адишне адгыр а Ихрекский дериди ад муIкьбыр: Нижний Катрух, Верхний Катрух, Аракул ва мадды муIкъбыр. Зиянбыр выр подстанциедис, йаIкв адиший Хлюта ки. Сиене сытIа йаIкв адишне абгыр а 23 муIкъ.
Эккед зиян-зарарбыр выр а хусуси инсанашды халмыс-лахмыс, багъмыс-быстанмыс ва мадды хозяйствамыс — лукур а забормыд масбыр, зиянбыр выр бегеде луза гьыъыр ад машинмыс ки.
Балад джигима нацIурды къирхыда мысъиди гьыъыр йыгад дамбабыр гьыъыр адиш. Гьадис гюре, меселла, редакциедид хьура аагид гьучIел йихире а хьидире, гьийгъа-быга, сада-кьуне мисед гьугъалбыр хьишихьвна — хынимешис гьыъыр ад футболад поле ки йихиси нацIурыра гьучIелала МыхаI. НацIурды къирах гийбхьура бегеде йиъине а футболад поледид, хусуси халмыд сархаIтмыда.
Дагъыстана, МыхаIд районди, эккед гьугълымыра выр ад зиянмыс гюре, объявить выъыр а чрезвычайный ситуацие. Гьад викис 1-ды августа йыхыIр.
Райондид администрациедире Давуд Сулеймановад указаниедыхьван гьади мадана выгыр иджлас выъыр а комиссия, оперативный штаб, еринмы дыхьыр гьацIара гьаъасды выр ад зиянбыр, гьамыд кьадар ва гьадыла хъуъ йыгыр йыгад гвалахбыр ва мадды вишир ад районди агьвалатад себебыр гьацIара гьаъасды.
Гьугъалбыр хъахъатIур мадана кваIчIур а ремонтмыд гвалахбыр.
Районди вишир ад гьугълумыла хъуъ агьвалатад бадана 29 июлас 2024 сыда райондид кьухьние Давуд Сулейманова игъивир ай постановление «О введении режима функционирования «Чрезвычайная ситуация» на территории МР «Рутульский район» хьур дур гъад. Гьа постановление е миди ливире урус чIилыла сиене районди ад инсанар гедкьын бадана:
— В соответствии с федеральным законом от 21 декабря 1994 года №68- ФЗ «О защите населения и территорий от ЧС природного и техногенного характера», постановлением Правительства РФ от 30 декабря2003 года №794 «О единой государственной системе предупреждения ликвидации чрезвычайных ситуаций», в соответствии с решением Комиссии Администрации МР «Рутульский район» по предупреждению и ликвидации чрезвычайных ситуаций и обеспечению пожарной безопасности (протокол от 29.02.2023 г.№ 3 ) в целях обеспечения безопасности населения и ликвидации последствий от продолжительных атмосферных осадков в виде дождя, Глава МР «Рутульский район» постановляет:
1. Ввести с 30 июля 2024 года по 01 августа 2024 года для органов управления и сил районного звена республиканской подсистемы единой государственной системы предупреждения и ликвидации чрезвычайных ситуаций режим функционирования «Чрезвычайная ситуация».
2. Главам сельских поселений, пострадавших от стихии, рекомендовать обеспечить исполнение решений, принятых на заседании Комиссии администрации МР «Рутульский район» по предупреждению и ликвидации чрезвычайных ситуаций и обеспечению пожарной безопасности (протокол №3 от 29.07.2024 г.)
3. Контроль за исполнением настоящего постановления оставляю за собой.
Глава МР «Рутульский район» Сулейманов Д. А.
Б. МыхаIды
