Май ваз джатIур гьугъара гьаабхыIр ва июнь ки гьугълумыхьван виъине а.
Ихьдыбише рухьура, гьугъал ризкь йиъи, хьур, гьадыы е ки раази диъи. ДжамаIхтире гьыъыр ад езелбыр бытIрана руъура, мал-къарабыр рач руъура, къурах джившир, ухьун увц1уд хьын ывылгара, хьур.
Амани гьугъалбыр бала йишине ки, руъура юхбыр, лархара мирибыр, былахбыр ва нацIурбыр.
ХаIр йыгъа хьиба–йукьа Мыха1д райондид коммунальный хозяйствадид къуллухчиер дуруъура Лалаъанди гьыъыр ад МыхаI мукъаI хьед сибгыд бассейнибыр темиз гьаъас. Темиз гьыъыд сагьаIльды вахт арыда выхьыйне, ма гьабыр ахъалцIара лилере, шумара, къатылмыра ва кьуркьура. Гъигъе руъура дурбумыд гъал, сипхьура мукъу1д хьедбыр, гьадис гюре гьабыр йыгъа шумуиди дуруъура дериди.
Гьа гадийше темиз ваъара ад са Лалаъанди ад бассейн диш. Гьабише темиз ваъара Гуфада мириед ки ва Йирек мукъа1 банаа выъыр ад бассейн ки.
Лархыд йишир ки, выдж хьед гьабише хъейир салтардиш. Эккед сагъул виъи сиене ЖКХ-дид къуллухчийшис ваъара ад гвалахад бадана.

Насир Ибрагимов