ГьаадхыIд улджумад йыгъа, 29-хьусды мартас, Махачкалди вокзала йибкьыр ай поезд Белгородский областа 600 инсан хана, гьабишикла 536 диъий хынимер.
Мийманашды рыкъаI хачкурдыбыр гьаъас вокзала йидкьыр ай Дагъыстанад Правительстводид Седри Абдулмуслим Абдулмуслимов, Дагъыстанад вице-премьер Муслим Телякавов, Махачкалдид мэр Юсуп Умавов, РД-над здравоохранениедид министр Татьяна Беляева, РД-над национальный политикадид ва динмыд гвалахмыд министр Энрик Муслимов, РД-над Халкьдид Маджлисед кьухьдыбыр, Росгвардиедид инсанар, «Движение первых» хьур активистер, духтурар ва маддыбыр.
Абдулмуслим Абдулмуслимова гьухьур, дыкьасмаа гьазыр гьыъыр ай ербыр хынимер кьабыл даъасды ва дюз-дюзгин гьыъыр а сиене лаазимды условиебыр ешемиш дикисды. Гьазыр выъыр а эккед программа экскурсиямыд, хынимер мачхул даъасды ва гьабишды сагълыгъад процедурамыд.
«Белгородский областа Дагъыстан Республикади йыдкьыр а 600 инсан. Гьабыр ешемиш дикиси хьибды джигиди: Махачкалди ад школа-интерната, Дербентди школа-интерната ва «Солнечный берег» хьур хынимешды лагере. Хынимешис джуьхьды халма ад ка йикиси, гьадис гюре йе гьыъыр а сиене гьазырвалдыбыр. Гьадыла саваенди яхда анидиъи психологар, реабилитологар, магьаIлимер, хынимешихьван гвалах выгыргасды», — гьухьур Абдулмуслим Абдулмуслимова.
Кьылебыр гьыъынид министре Яхья Бучаева гьухьур, хынимешихда, йидкьыр ад Белгородда, йикиси сиене лазимды карбыр, ислеэнды йыгъала хъуъ беслемиш гьаъасды дарсбыр. Гьадыла саваенди гьабишис гыргаси машхулат дикисды ва спортивный мероприятиебыр.
«Йыхды гвалахмыд сураа ес йыгара са машхулатмыра гъайри беслемиш хъаъас кьыле выъынбыр, хынимешис бегьем ваъас йыгара юкьубхьусды четверть, цIамды дарсбыр йе сигыр ай гьабхыIд четвертес дистанционно гыргара. Йе гьазыр диъи миди хаIр хъаъас джыгыд дарсбыр!» — гьухьур йибкьыр ад группадид кьухьние, Белгородский областе ад Комсомольский СОШ-дид директора Людмила Тарасовара.

Б. МыхаIды