Мистед сыда 12 декабрес йишир а Российский Федерациедид Конституциядид хьибц1ыр сен, гьадис гюре ихьды ху1кимете юкьсура йыгыр а эккед байрамбыр.
Мыха1д районди ки гьа йыгъ уфтанна агъмиш гьыъыр ай. Байрамад къутливалды выъыр ай Мыха1д райондид кьухьды Давуд Сулейманова, аксакалашды Советед седри Эмин Эминова, культурадид Управлениедид кьухьды Артур Мухтарова, райондид хьылешды суалмыд кьухьды Индира Салмановара ва мадды сыт1а дишир ад идарамыд кьухьдыбише.
Гьадыла хъуъ Управление культурадид къуллухчийше выр ай актовый зала быт1рад концерт гьа байрамас.
12 декабрес 1993 сыда йишир ай Россияди сечкибыр, гьади джама1хтире джуьхьды сесбыр выр кьабыл гьыъыр ай Российский Федерациедид Конституция.
Гьадыла хъуъ 12-хьусды декабрь Конституциядид йыгъ на йишир ад йиъи, ху1киметед сабыйды арикид байрамад йыгъ на.
Конституция йиъи ху1киметед бин сиене правовой системадид Россияди.
90-хьусды сыдырмыд ахирес Россиядид Конституциедис четин йишир ай кьу1нды политический кризисере, амани гьа четинва1ля лазим йиъид кал гъаъ а1хъа1ч1ури.
Хьурагине конституция РСФСР-ед, СССР-дик кине кьабыл гьыъыр ай 1918 сыда, сахьусды СССР-дид конституция кьабыл гьыъыр ай 1924 сыда. Гьадид джыбра 1936 сыда кьабыл выъыр ай мадды, гьадид дур джама1хды идхьур ай «застойная»-хьур. СССР ху1кимет гийбхьума ани йиъий 1977 сыда кьабыл гьыъыд конституция.
Гъийгъа яхда ад Конституция — гъигъды бин йиъи Россиядид демократиедид лаъва1лид. Гьа лазимды джамаха1т бадана документ йиъи. Конституция инсанашис йиъи сахьусды закон, гьадады баласды карбыр йес-ва1с гьац1ыр йыгад йиъи.
Гьамыъды конституциядик китхьур а дегишвалдыбыр — ихьды ху1киметед къухьды 6 сыда керъэре хьур ва Ху1киметед Думадид депутар дикиси 5 сыдыд арыди — мидылл хьуъ гьабыр кет1илдед диъий 4 сыда.
«Сахьусды экземпляр» Конституциядид ад йиъи Россиядид Президентед библиотекади Кремлиди, гьадид гъара лийир а ирды темизды къыдыкь, гьады гъад герб гьыъыр ад йиъи гымышекла, къизилехьван кихьир а Конституция России хьур.
10 сыда 12-хьусды декабрь йиъий ихьды ху1кимете выхадниед йыгъ. 24 декабрес 2004 сыда Ху1киметед Думадире кьабыл гьыъыри поправкабыр Трудовой Кодекса. Гьа закондыхьван Конституциедид Йыгъ выхадниед не мадиш.
НАСИР ИБРАГИМОВ
