Сиене ихьды ху1кимете гьыъыд кал, Мыха1д районди ки агъмиш гьыъыр ай Ватандид Йигитешды Йыгъ.
Гьа йыгъа Мыха1, Славадид обелиск гъад ха1ятди, ягъмиш дишир ай райондид администрациедид къуллухчиер, районди ад идарамыд кьухьдыбыр, СВО-дид иштракчиер Украинада хъидкьыр ад, мехьтебырма ад телебиер, журналистер ва мадды джамаха1т.
Ягъмиш дишибишис Йигитешды Йыгъ къутли гьыъыдыла хъуъ ва мыслахъуъ гьа йыгъ агъмиш гьаъара ад йиъиди ихьды ху1кимете джыкана ихтилат гьыъыдыла хъуъ, гьа байрам кьуле выгыргара ад Индира Салмановара ч1ел выр ай Мыха1д райондид кьухьнийде Давуд Сулеймановда. Ягъмиш дишибишде райондид кьухьние мисе гьухьур: «Гъийгъад йыгъ — генеки йес са багьанадид йыгъ йиъи сагъул-варул ваъасды ихьды да1види дишир гьаатхы1д дидабашис, гьамыъды йигитешис гьабише выъыд ва сивирхьере ад замха1тес Ватан бадана. Ми йигъа йе гьабишис ваъара эккед сагъул ва гьабишди йигитва1лис икрам гьаъара. Меселла, наъгъа зас къисмат йишир ай Дагъыстанад Йигитешды Ха1дий выс ихьды йигитес, иштрак гьаъара ад СВО-ди Рагимов Гаджимурадыс. Йигитер яхда бала диъи, амма эккед дер ана рухьура, анидиъи дыркьыбыр ки. Гьабишды дурубыр выр а балад райондид идарамыс. Сагъул ваъара генеки гъабишис, гьабишды йигитва1лис».
Хьеликана йигитешды дуру къутливалдыбыр гьаъара гьади далгыри Дагъыстан Республикадид Халкьдид Маджлисед депутат Шафи Абдуллаев, райондид аксакалашды Советед седри Эмин Эминов, СВО-дид иштракчиер Ламаз Джалалов ва Назим Ибрагимов Лучек мукъа1ды, Казбек Абдуллаев Шиназ мукъа1ды, Нурдин Фатахов Мыха1ады ва Амир Темиров Амсар мукъа1ды, мадды юлдашер. Гьади адыхъунды йигитешис ва Украинади ад ихьды эскерешды дидде, нинде выр ай къутлива1лид кагъатбыр.
Сиъин СВО-дид иштракчийше гьыъыри эккед сагъул-варулбыр Россиядид Президент В. Путинис, Дагъыстанад Кьухьды С. Меликовас, Махачкалдид администрациедид кьухьдыбишис ва райондид кьухьды Давуд Сулеймановас вылц1ара ад кюмгид бадана, вырыхы1ре ад хыл-худад бадана.
Йигитешила саваенди гьади ч1ел выр ай гьабишды дидабашис ва нинабашис ки.
Мехьтебырма ад хынимеше кьыле гьыъыр урус ва мыха1д ч1илыла шиъирбыр, йигитешды дуруу кихьир ад шаиреше.
Хьеликана мехьтебед телебийшихьван сыт1а кьухьдыбише гьабише гьазыр гьыъыд венок ва сиене джва1ршде хад быч1быр лихьири Вечный ц1ыя.
Гьа байрамад йыгъ агъмиш гьаъара инсанар хайлингеде гьади гимадай, шикилбыр рыхы1ре СВО-дид иштракчийшихьван ва мадды мачхулвалдыбыр гьаъара.
З. Магамедова
