Дагъыстанад Кьухьние Сергей Меликова 20 ноябрес актуальный суалмыд совещание выгыргад гедене ихтилат гьыъыр, шууна Дагъыстанада кьабыл даъас йикисди Палестинада дахыд инсанар.
Республикадид Кьухьние йик1иы лихъийир, гьа йыгъа йоква1с сахьусды самолет фондмыра на Дагъыстанад инсанаше ягъмиш гьыъыд гуманитарный кюмег хана ливчир Египетди гьада гьа сигыр ад карбыр лийкьа гьаъас сектор Газади хьур. Уже гъийгъа республикади выкьас мадды Россиядид МЧС-дид самолет, вихисды тиниъ мадды гьазыр гьыъыр ад кардымыд партие.
Сергей Меликовды ч1илмыхьван, кюмег Палестинадис Дагъыстанад суруула са кардымыхьван выр йикис диш.
“Ес йыхана гьац1ара вазырыла балад вахт виъид да1ви ад. Ва1с гьагвара а, шудаъ дыкьыркьара ади инсанар. Баласды йыгъ-лелер гъанийиъи йидикне кидишды инсанашыы. Гъийгъа гуманитарный кюмег Дагъыстана гьазыр гьыъыр а эккед, гьадыла гьазыр гьаъас шумуд иди самолетад рейсбыр.
Кюмег Палестинадид халкьдис са гуманитарный кардымыд йикисдиш. Эгер ихьды ху1киметед кьухьдыбише кьабыл гьыъыхьвна кьарар (решение), йе гьазыр диъи кьабыл даъас чарасызана Палестинада дахыбыр ихьды Дагъыстана”, — гьухьур Сергей Меликова.
Дагъыстанад Кьухьние выр поручение республикадид Правительствадис гьазыр гьаъ хьур суал, шууна кьабыл даъасды палестинциер бегедене.

З. МАГАМЕДОВА