Шадды хабар йибкьыр а ес, мыха1быр:
Аьмыйды дух, регьбер хъишид-хваш гурди!
Депутатваьле ма1х1кем вишир абыр,
Шурад халкьдид дерде хъиркьыд, хвашгурди!

Хвашгурди вы, сахьва гурди, йигит дух,
Сада амзыр выъыд виъи ва къуллух,
Кьва1дхьусды хылыс лышнайк кий ва яйух,
Хуувгъуд халкьдид дерде хъиркьыд, хвашгурди!

Выды рыкъаь сирхьире е хайишбыр:
Мыха1 адиш Гьахти лик1ур ад газбыр,
Халма ишлег гьаъара лархыд хьедбыр,
Джывыд — халкьдид риге хъиркьыд, хвашгурди!

Спорткомплексмы гьаджадгъуд паалыванар,
Гьааса ки кам диш еде чемпионар,
Ми банымыс гьадгуд и къегьреманар,
Йигит халкьдид дерде хъиркьыд, хвашгурди!

Емиш хукаа гъывылгара-цех адиш,
Мал хъаъардиш, сывыма ятах мабдиш,
Базарад алвер кучумыс лейих диш,
Юхсул халкьдид дерде хъиркьыд, хвашгурди!

Мийманашис саптырдиш мийманхана,
«Самура» а мыха1бишды туйхана,
Дын лидкьыр а, адишне деллекхана,
Етим халкьдид дерде хъиркьыд, хвашгурди!

Культурадис сихьири ва тывды хал,
Амаа адиш гьади хизан, джуды мал,
Му1къма ад идарамыд вишид вайх1а1л,
Гьамыд дерде хъиркьыр ад, вы хвашгурди!

Кечки ухъувц1уйхь йыхдыхьван халкьдид лакь,
Ры1хьды ч1илды кемеред къизильваракь,
Дагъыстандид са район-шубаьшды халкь,
Эйлуг ваъас хьур хъиркьыд, Вы хвашгурди!

Шафи Амсари