Сахьусды октябред йыгъ йиъи ешлид инсанашды байрамад Йыгъ. Гьа байрам ихьды ху1кимете 1991 сыдыла хъуъ гивхьир ад виъи. Байрамад Йыгъ кьа1сды-кьухьды инсанашис къутли гьаъара сахьусды джуьхьды хынимеше, хыдылаше. Гьадат йишир а райондид ЦСОН идарадид къуллухчийше ки джва1р эйлуг гьаъара ад кьа1сдыбишис гьа Йыгъ къутли гьаъад ха1р сыда. Сахьусды октябред йыгъ гуьзет гьыъыр, гьа идарадид къуллухчиер ягъмиш дишир дыхьыр ай кьа1сдыбишды халма байрам къутли ваъас хьур. Гьадыла саваенди, специальный военный операцияди иштрак гьаъара ад эскерешды кьа1сды дид-нин ки агъмиш дыъыр ай гьабише. Генеки гьабише агъмиш дыъыр ай СВО-ди дыркьыд ихьды райондады йигитешды кьа1сды дид-нин. Сиене кине 10 хала дыхьыр анидиъий гьабыр. ЦСОН идарадид къуллухчийше ягъмиш дишид кьа1сдыбыр кьуле эдири, джва1р шыв кюмег выр йигад йиъи ди, йигад-хъыгад ва джетинвалды-дагъамвалды шывга ама хьур суалбыр выр ай гьабишис.
Ха1р дыхьыд хала идарадид суруула выр ай 1000 манутад улесдымыд сумк1абыр. Кьа1сдыбыр джва1р агъмиш дыъыны эккене рази дишири, сагъулбыр гьыъыри йидкьыбишис.

Зарема Исрафилова