20-хьусды февралес, Нинды ч1илды дуьнйадид сывабад улихьде гид йыгъа, Дагъыстандид ма1гьа1лимешды университете Сыназырады Гьезерчи шаиред творчестводид конференция выгыри.
Дагъыстандид ч1илды факультетед кьухьдыбыр на рутул ч1илды гьа1лим Ибрагимова М.О. чалыш диъий выгыргас гьа конференция 2017-хьусды сыдыд хумухун – Нинды ч1илды Дагъыстандид сываб ад вахтинди, гьис хьурди шесне ихьды шаир гьухуд 120 сен йиъий. Амма гьа гедене мадды гвалахбыр арыди идхьуйне, Нинды ч1илды дуьнйаадид сываб ад йыгъырма выгыргасна йишир.
Сиене Шиназ Гьезерчиклады китабырмык гьухуд сен 1887-хьусды кини йиъи, амма гьекъикъатна шаир гьухуд йиъи 1897 сыда – ми гвалах мя1гълим вишири юбилеес гьа1зырвалды ваъад гедене.
Гьезерчи калды дур-ун ад шаирер рутулашихда ад 3-4 диъи, гьадыыла баласды ч1илды гьа1лимер на ч1илды устарар йидкьыри рыкъа1 ивес конференция – Алисултанов Алисултан Султанмурадович, Ибрагимова Фатима Магомедовна, Ибрагимова Мариза Оглановна, Исмаилова Эминет Ибрагимовна, Сулейманова Таисия Алисултановна ва маддыбыр.
Шиназ Гьезерчид рыш, язна, хыдылар ки йидкьыри, ихтилатбыр гьыъыр шаиреклаа, конференция гьа1зыр выъыдбишис сагъул-варул выъыри. Гьа1юхь йиъи, Рамазанов Рамазан Атрашевичда йыкьас йиширдиш гьа йигъа – гьание бала гудж сивхьир Гьезерчид творчество рутулашис машгьу1р вишин бадана.
Шаиред гьу1мирдикла Мариза Ибрагимовара ихтилат гьыъыри – хыныхваьликла, джегьилваьликла, гьу1риетед вахтмыкла, юкьды ч1илыла кирхьед шеирмыкла – гьа1рабала, рутул ч1илыла, тюрки ч1илыла са ки йиргала. Профессор Н.И. Кузнецова на Л.И. Лаврова джухьды китабырма ийид Гьезерчид шикилбыр ки гьагва гьыъыр.
Фатима Ибрагимовара шаиред творчестводикла йыхана гьухьури – гьание балад сенбыр йиъи Гьезерчид шеирбыр сыт1а гьаъад, китабырма иед. Эминет Исмаиловара на Алисултан Алисултановара шеирмыд нетиджедикла докладбыр гьыъыри. Рутул ч1илды Фондад кьухьды В.Г. Казибеков ч1ел увуху1никла, шаирер йыкьасды архымыс йик1ыыла уджудхуникла гьалгыри.
Ес сиенебишис к1аъла хъуъ гьац1ара Гьезерчид шеирбыр, китабырма иесма. «Шахта-Баба» йик1ыылана ваъарай – г1а1ля-г1а1ле илсанашды гывгъа1ре, сиенебишис вац1ара вишир. Гьааса кал йиъий – гьа ихьды халкьдид шеир виъид кал, автор адишды.
Бала рази риъи ихьды джегьилер йидкьыри хьур – шеирбыр кьыле гьыъыри – ихьды ч1илыыла ки, урус ч1илыыла ки – Фазил Дашлае перевод гьыъыд Гьезерчид шеирбыр. Гьална гьа джурба-джурад университетмыд студентешис гудж выъырдиш: конференциядикла хабар вишийне, джва1р йидкьыр, йик1ыылана ха1р гьыъыр шеирбыр, рутулашды конференцияды нур-яз йыгыр.
Гьемисед джегьилер адийкьама, не ихьды ч1ел сувгасдиш, не ихьды шаирер йик1ыыла удхасдиш!
Мариза Ибрагимова
д.ф.н., доцент ДГПУ
