30 сентябрес Мыха1д райондид администрациеди вишир ай Административный Советед иджлас. Гьа выгыр ай Мыха1д райондид Кьухьды Давуд Сулейманова.
Миди повесткади сихьир ай мисед суалбыр:
1. Шыв агьвалат виъиди Рутульский районди ДР-дид развитиедид приоритет «Обеление экономики» хьур проектед сураа.
2. Шыв гьа1ле ади духтурашды гвалах райондид джамаха1т бадана ва шыв гвалахбыр гьаъара ади гьа йыха вишинид сураа.
Сифтед суалад сураа миди гьалгыри райадминистрациедид экономикадид отделед накьумыд ва джыгымыд суалмыд ведущий специалист Салам Магомедрагимов. Гьание гьухьури, райадминистрациедире ва му1къмыд поселениемыра гьыъыр а са кьадардид гвалахбыр хал-лах ва навкьбыр ху1киметед яц1а ийин бадана, закондихьван дишне алвербыр гьаъадбыр учета ледшун бадана. Му1къмыд поселенияма сыт1а гьыъыр а гвалах ваъад группабыр гьади ад къуллухчиер, депутатар ва полициедид участковый уполномоченныер ки кине. Гьади ма1гьлима обходбыр гьыъыйне, 53 административный нагьакьвалды ывгыр а КоАП-ад 14.1 статьяди ара кид. Гене ки гьац1ара гъыъыр а, шудаъ ади гъийгъа районди сиене сыт1а хал-лах ва мадды кьухьды объектбыр. Гьа гвалах 80% лаъ выъыр а, ва ФИАС-дид сийагьа кийир а 4331 объект.
Гьаса йишийне ки, гьалаки райондид Кьухьды Давуд Сулейманов йиширдиш ми ачутала рази. Гьание гьухьури, ми наукьумыд актуализациядид ва ОКС-ед, налогмыд база лаъ ваъас хьур ад гвалахмыд усул ц1амдына виъид гедене, му1къмыд сельсоветеше гьа гвалахбыр йа1гъа1д кал джаъад не гьа1саб руъура. «Мисед сахьусды лазимды гвалахбыр кьуле джыгад кьухьдыбишис райондид кьухьдыбише жесткий мерабыр кьабыл гьаъасди и! — гьухьури Давуд Сулейманова. — Гьа суалбыр ДР-дид Кьухьнийды артухды контроле гъани йиъи!»
Ми суалад сураа гени ки далгыр ай райадминистрациедид кьухьды Магомед Магаррамов, Йирекды, Лучекды, Мыха1д, Къинед, Мишлешед, Ц1инды Быджед ва мадды сельсоветер, райондид идарамыд кьухьдыбыр.
Кьва1дхьусды суалад сураа гьалгыр Рутульский ЦРБ-дид кьухьды духтур Идрис Алиев. Гьание джуды фагьам сивхьири райондид джама1хтид джандымыд сагъвалды уву1ху1нис вы йыха выъынис; ц1ам хъишинис инсанашды арыди начагъвалдыбыр, дыркьынбыр; лаъ гьыъынис мероприятиебыр начагъвалдымыд профилактика бадана, дуьзене ресурс ягъа1д кал арыди йыгынис.
Гьание гене ки гьухъури: ЦРБ-ди стационар а 70 койка ад, 10 койка йыгъад стационарад, кьва1б участковый больница — Мишлешди ва Йирек — гьа1рди 15 койка ад, 4 духтурашды амбулаториебыр — Ц1ахы1ре, Хъылда, Аады К1ат1ры1хъди ва Ц1инды Быджде, 9 ФАП ва 16 ки ФП. Сасад ерма ра1хъбыр адиш, гьадыла четин и гьади дыкьас, сасад му1къма адиш телефонад ва интернетед связьбыр ки.
Районди гвалаха а 34 духтур ва 163 къуллухчи (йыкьа1д медперсонал) — гьа йиъи 78% нормадид. Сиене ФАП-ма ва ФП-ма къуллухчиер гъедкьыр анидиъи, районди гъеджедыркьара а узкий специальностьмыд духтурар. Гьадыла лап элла йиъи гвалахмы совместительствадид коэффициент. Сиене гвалаха гъад специалистешихда а лазимды сертификатбыр.
Гъийгъа райондид здравоохранениеди сивхьир а йыхды тенденция: гвалах ваъара кувч1ур а ц1инды типовой больница 50 койка ад ва поликлиника 100 инсан кьабыл гьаъасды сменади, ва гьадис лювшур а лицензия ки; баласды районди ад духтурашды пунктма гьыъыр а ремонтбыр ва гьамыс выр а лицензиебыр, мадад 6 идарамыс ки ми сен бегьем йикисма, ремонтбыр гьыъыр, лицензиебыр люшус хьур плынди а.
Мисте ЦРБ-ди 6 духтур ледшур а гвалаха: 2 хирург, гинеколог, эндокринолог, терапевт, педиатр. Гьалаки духтурашда сура обеспечение ц1ам и — 14,2 % 10 гьагъзыр инсындис. Сагьа1л йыха виъи йы1кьа1д медперсоналад усул — 73, 0 %.
Лап лаъ йишир а дуллухбыр: духтурашды — 39 961 манут, йы1кьа1д медперсоналад — 17 810 манут; гьабыр йиъи лаъ республикади амыла, амма гвалахад качество мисе элаа адиш.
«Гьа1ммише контроля гъа хынимер дыркьынид суал, — гьухьури Идрис Алиевара. — Гьа агьвалат е саъ хъывыъыр а: 18,1 виъий 2015 сыда, 6,9 виъи 2016 сыдыд 8 вазырды арыди; инсанар дыкыркьадид сахьусды йиъи начагъвалдыбыр нафас лебшуд джыгымыд, ц1инды ядлымыд, БСК ва маддыбыр. Ц1ам хъишир а гьабыр эбир гывгъа1д джыгымыд сураа. Инсанашды гьу1мирбыр ху1ляхе йишир а 1,5 сен духъун, ва 2016 сыда гьа виъи районди 66,2 сен».
Ми докладад сураа гене ки далгыр ай райондид терапевт Элла Акимова, кьухьды духтурад заместитель Мадина Айвазова, Мишлешед больницадид заведующий Гелани Ибрагимов, Лучекды ФАПад кьухьды Рена Шахбанова ва мадды къуллухчиер.
Ми сиене хуъ гет1ид суалмыс административный Совете кьабыл гьыъыр ай лазимды постановлениебыр.
Гьадыхьван Административный Советед иджлас бегьем вишири.
Къинады Саид
