Авал-авал ай хьва са къарине, выг1ыл. Сиенебишды къариймаше гьаъара хьва къеденбыр на халычебыр. Гьеми хьыдыние сешун гьаъардиш хьва. Выг1лире хулкара: «Гьай къари, ес ки са къеден, хыли-хурджум гьис джаъад?»
Миние рухуьура: «Гьай выг1ыл, яхда дынбыр адиш».
«За лешус вас», — рухьура выг1лире.
Выг1лире йыхьыр лепшура йиц1ыд, ц1ухьуд килув дынымыд, къариеде вылц1ара.
Миние рухьура: «Гьамыъ мида зы ки Гала руъура, хъу1гъу1ма ес ки са къеден ваъ».
Къариере рухьура: «Гьай выг1ыл, зас ми дынымыхьван гвалах ваъас раха1т йикисий, ва зас ц1ам ит ки лешаь».
«Башуста», — рухьура выг1лире, лешур вылц1ара минийис са дык1ые ад ит ки. Выг1ыл ки Гала гьархы1ри къазамиш гьаъас.
Къариере ылха1ре каргъу1ре дынбыр. Итик т1или ки кывырхы1ре, дынбыр ки ылха1ре а. Дынбыр сиене хылабак киджилхъара, киджитхъымыкля мисед гулилий выъыр, аъ ц1иы хувулгъара. Гьеми йиц1ды, ц1ухьудды килувакла минийис вуруъура гьемисед са хыле у1вгъу1д са эч. Гьамыъ шыв гьаъас, выг1ыл хьу1гъу1маа къеден выъыр адиш, шыв чара ваъас, кольбыр ки ерина йишир адиш. Миние шыв гьаъара, выг1лис гьаджагусна гьеми эч ивирхьере ари к1азыла.
Хьанне выг1ыл хъиркьыр а: «Гьай къари, — рухьура, — шыв гьыъыри ва дынымыкла?»
Ара хала к1аз хана йиркьыр, къариере эли г1ала саъ хыл сигыр, ара колирды эч эгъеп1ир рухьура: «Мидей, гьеми эч ки за выъыд виъи», — ара саъ ихъивир, маа гъаъ эхъеп1ир рухьура: «Гьеми эч ки за выъыд виъи». Са ц1ухьура хылис миние ми игъвильэре увга выъыри. «Мидей, гьеми к1аз увц1ур а колимыра», — рухьура къариере.
«Гьын, иди йыхаи мы, кьеден викис гьамыкла», — рухьура выг1лире. «Гьамыъ шыв гьыъын лазим и», — хулкара выг1лире къариеда. Тиние рухьура: «Гьамыъ вы йыхьыр дама йохбыр гьат1ур йигара, хьели за къеден ваъара ква1рч1уси».
Выг1ыл, лузур йоква1д кьуля дама руъура. Ми гьархы1йне ка, гъари ки мадды ра1хъне руръура минийды джубра. Хырыдакал лурзур хъарарцара, тинаака ун а хукас балта гъирхьедид, усбыр рат1удид. Гьеми рахыр лаъкал кийбхьуд са къва1кьы ка ла1ргъу1ре. Эла саъ выг1лид дур сырха1ре сес ваъара: «Уфудалдааам, Уфудалдааам». Ми гийхьир хъалцара, шыв ун йиъидихь гьухьур. Къариере ма рухьура: «Уфудалдаам, Уфудалдам, йох гьат1ухьна выг1ыл йикьиси, хын гьыъыхьна къари рикьиси».
Гьеми ма гийхьир хъалцара – шыв гьаламат йиъидихь гьухьур, ай Аллагь. Ма ыхьа1ка ун руъура: «Уфудалдаам, Уфудалдаам, йох гьат1ухьна выг1ыл йикьиси, хын гьыъыхьна къари рикьиси».
Гьадады хыла хад балта ки хьуъ хахъагъур, яваъшене кьул аа ивир сухъукур хъу1гъу1ре халыхда. Къари минийыла улихьде гине хъарахыр лехъреркьара хала. Выг1ыл лихъийкьыйне, къариере минийда хулкара: «Шууна йишири, гьай выг1ыл, гьат1уриме ва усбыр»?
«Гьа рыыш, зас дама гьаламат гьагури, гьемисед ун йишири, гьадыла зы ки гийхьир хала хъиркьыри, зас шыв гьаъасды ки ац1ардиш», — джываб выри выг1лире.
Гьа арыди халды джилила тиниъ виъина ай ч1ип1к1ант1ый. «Уув, — рухьура хьва къариере, — Джан выг1ыл, ихьды нинды ришире хынбыр, къеденбыр гьаъад хьур гьемисе ришири», — ч1ип1к1ант1ыяхда гаркъара.
Гьаса гьухьуйне, выг1лире рухьура: «Ууф, джан къари, вы гьаса ришир, зада гьыъыд хынбыр, къеденбыр гьидисдыбыр йиъи», — къариес гарданбыр ки хъыъыр гийхьир адкал сыхъы1дкьы1ри къари не выг1ыл.
Гьаса йишийне, хьыдынийды гьамал балад йиъи. Гьабыр гьади мадай, еве миди хъидкьыр. Зада гьадады хахъый са лывт1ыд са налче, гьа ки ара гъы1хъла Тамамгые ху1хъу1вшури.
Исрафилова Заремара
кивхьид виъи МыхаIды
Гафарова Бийжетды ч1илмыла
