Дагъыстандид врио Кьухьды Федор Щукин ха1сил йишир ай Запорожский областе ад Михайловский муниципальный округад кьухьнийхьан Вячеслав Бедняковыхьан.
Ха1сил дишид вахтинди гьабише агъмиш гьыъыр ай йыгыр бегьем гьыъыр ад гвалахбыр ва мидыла хъуъ шыв гвалахбыр гьаъасди. Йик1ыы лахъахара, хьибыд сен мидыла хьурагине Россиядид президентед указахьан район кибт1е выъыр ай Дагъыстанак. 2023 сыдыыла хъуъ гьади гвалах ваъара а аварийно-восстановительный бригададире, дюз-дюзгин хъыъыр гьазыр гьаъара кьынне сиг1ын сигасды объектбыр ва котельнибыр.
Мидийкьама гьадыла хъуъ к1алба-усла хъыгыр гъилы лихъийир ай шумуд иди объект: мехьтебыр, к1аъды хынимешды садикбыр, культурадид идарабыр на клубыр, больницабыр, идарамыд зданиебыр, бала квартирабыр ад халбыр, хьедбыр хъыгыр ай, канализациебыр дюз хъыъыр ай ва мадды гьакьасабыр.
Округас выр а специализированный техникабыр, генераторбыр, оргтехникабыр, улед-раг1адбыр, хал-лах луза, ц1ине хъаъасды материалбыр, дава-дарманбыр ва мадды-мадды балад лаазимды карбыр. Дагъыстандид духтурашды бригададире йыгыр ай 1500 балад консультациебыр ва 200 операцие.
Са мистед сыда дюз-дюзгин хъыъыр гъилы лихъиес йыгара а 19 объект, 9-ды объекта гвалахбыр беслемиш йишир а. Мидыла хьуъ кьабыл даъад ка мистед г1ы1нне округады 50 хыных кьабыл даъас «Солнечный берег»-хьур лагере.
«Ми гьаатхы1д сыдырма Михайловский округ ес гьекъийкъат шурад йишир а. Дагъыстанабише гудже ыдхы1быр хьуъ хадулгъад диш — е мысга бегеде ха гьасад инсанашды, гьалыс джетин йиъиди, ва куьмег вылц1ара сиенебишис, гьалыс гьа лаазим йиъиди. Дагестандире мидыла хъуъ ки выси куьмег джуьхьды хыдиймашис, герексен гьабишды яшайиш йыха хъу1гъу1ма» – гьухьур Щукине.

Б. МЫХАIДЫ