Эвелды са заманады, дуьнйады ай са хиндадый хьыдылды. Гьанийихда ай кьва1р рыш. Кьухьды рыш ниник кирикарай, нинки, рышки гьухьусдухъун г1ал кидбыр диъий, йик1 ч1ирид, мизы авгъу гъад. Гьеми нин не кьухьды рыш гьадгуйне, инсанар рыкъа1 а1гъда1бч1урай, са къумшики мибышихьван гьалгардиший, хырыда гадгъа1рей.
К1аъдыбыйды рыш инсанашис бала хъыргарай, мибыйды джуду дидик кирикарай, йыхды ху1рмитдид, гьалысга хайир гьаъас йигад риъий, хьесымала ки быт1рад гъеблид ухшербыр ад, мувараткалды, т1ылбырки сакитды рыш риъий.
Нинис кьухьды рыш лап балана хъыргарай, к1аъды рыш гьаргур йигардиший, дидик кирикара, хьур. Сиене халды гвалахбыр гьаъас вылц1арай йа1квалад наха1дийкьама, йыгъа кьву1не эккед парч хана хырыдад рыкъа1 рыхьыр хьед йихис вылц1арай, амма илесдыбыр гедгыдбыр йиъий гьеми рышес вылц1ад, гьабырки тылыес ка хабгъурай.
Йыгъырмыкла са йыгъа, к1аъды рыш хьидыхда рыхьыйне, хьед лебшуд джигиди минийды бегеде руръура са кьа1сды хьыдылды касиб валыгмар гъана, гьеми рышеда хьед ягъа1ре.
Рышере хьесымахда яхъ ки гине хьед выр, рухьура: «Рагъаъ, нин джан, ха1лал йиший.»
Хьед рагъыдыла хъуъ, гьеми хьыдыние рухьура: «Сагъул, джан нинды, шудаъ быт1рад рыш риъидай. Джан нинды, изды йик1ис гьаса йиъи, вас за аманат гьаъас йигара, выды йыхвалды на мизид ширинвалды гьувгуйне».
Гьеми хьыдыныйды дур йиъий Периханум. «Захда хъарац, джан нинды, за вас аманат гьаъара, мидыла хъуъ выды г1а1ля саъ сипхьуд ч1ел, гьухьуд ихтилат быт1рад быч1иы на багьад лял якъута сувкуй», — хьур, сухъургур.
Рыш парчки ляхъа1шур хъу1рире хала. Хала лехъеркьыныхьван, нине да1гьви ваъара ыхьа1 гьыъыр, хьур, гьили марай, гьалыхьван марай, хьур, шыв гьаъарай, хьур. Ми рышере джываб хъывыс, хьур ана, г1ал ачых гьыъыд ка, г1аля са багьад, багьад лале якьутбыр силхьвара.
Нинда лал хъивилхьвара, гьарай ми шыв карбыр, гьеми шыв гьаъабыр йиъи, хьур, таджиб руъура. Рышере телесыхана ка ихтилат гьаъара йиъид йиъдка, гьаса ки гьеми рышере ихтилат гьаъад джигиди г1а1ля саъ са1бгъ1ура а лале якьутбыр.
Эгер гьаса йиъиди, рухьура нине, быгамадана хьидыхда хьед лешус мибыйды кьухьды рыш сиригас. Гаркьаси гьанийды г1а1ля шыв са1ч1усди. Гьеми к1ыъды рышере кьухьды ришиде рухьура: «Вас гьада кьа1сды хьыдылды гьаргуйне, гьанийис идды мизихьван лац1ыр хьед вияъ».
Амма кьухьды рышере рухьура бизарана: «Бес зас мадды пеше лабт1ур ама халт1дис хьед кывылц1ара суркьусна».
Нине рухьура: «Вы рырых, шунага ки быт1рад быйды парч ки хана».
Еримиш руръура гьеми рыш хьидыхда, хьидиде леркьыйне ка, явашды хьа1лехьван гьеми рышед бегеде са быт1рад валыг гъад са хьыдылды, гьархыд буй бухах кид джвагарды кьа1сий руръура. Гьеминие са хуп1 хьидид вагъа1ре. Гаркьара гьеми рыш, гьеми хьыдыныйды устубаши гъеблир ц1инды валыг гъа, быт1рад шууна и за гьеминийис хьед высди, ти рышес касиб хьыдылды риъий гьаргуд, гьание алхыш гьыъыр, за гьеминийда шууна и ягъа1сды. Рышере джываб вылц1ара, гьеми хырыдад рыкъа1 багьад дзырад парч ки хана йиркьыйне за вас хьед шууна йиъи вылц1ад, рырых рагъаъ, рухьура рышере. «Выды йик1иыхда гадкьыр вас гьасад пай выр йигара,- рухьура Ху1риперире. — Мидыла хъуъ выды ха1р са ч1ел г1арашиы на гъы1ба1шиы гъургъуй»,- гьемисеки гьухьур, гьеми хьыдылды сухърургара.
Рыш халды ригиде лехъеркьыд ка, нин гъаъ игърирхьвара гьеми рышеде рухьура, лалга, хьур.
Рышере лалгас, хьур, г1ал ачых гьыъыд, г1а1ля саъ кьва1б г1ар на кьва1б гъы1б сивилхьвара. Нинда лал хъивилхьвара, ай гьарай гьеми шыв гьа1джайибды карбыр йиъи, гьеми сиъин выды тахсир кар риъи, хьур, к1ыъды рышахда лал, а1ъбыр гьаъара.
Нинды да1гьвияла гич1инире лаъ лурзур хала гъаъ рахара, гьили руръус, эхир дамыхдана суруркара. Са кьадар гема рирхьыйне кал, ха1сил руъура гъы1рче йиъид джигьил пачагьад дух, джуду нукерер ки хъуна. Яхыр гьеми гада рышед бегеде руъура, хулкара, шиви вада гьыъыд, гьал йиъи бизар рыъыр ад, гьис решере вы?
«Зы исты нине хала гъаъ йиригыр кьухьды рышид бадана».
Пачагьад духарыс гьагвара а, гьеми рыш лалгыдыхъун г1а1ля саъ лале якъутбыр сабгъу1ре, гадиес таджиб руъура гьеми карды, эхир рышере ихтилат гьаъара джу йидкьыд вакьиедид.
Гадиес рышед быт1равалды гьувгуйне, рыгара руръура, гьеми за зас раъас рухьура, хьур, хиял гьаъара. Гьеми рыш джухьван хъырыргара джуду нинды на дидды бейде хъыргара. Шад дишир эккед дават ваъара. Варлы, бахтлы дуруъура гьеми рыш не гада.
Амма кьухьды рыш нине хала гъаъ йириргара, шудаъ хала г1арар на гъы1бер иес, хьур, гьаса дама йиригыр гьили гьархы1рдики гьалысна гьац1ыр диш.
