Улабыр едеди, хылабыр диндж гьаъ, ичи едеди — гъа1л.
Лаъ ту лийийне, супелмар т1алхъара, са ту лийийне — мич1ри.
Вылц1ад джумарт и, лебшунийхъаъ, гьание хъывысды гьац1ара.
Мердед йик1 лаъ хъу, къизилед капырахъаъ.
Ярах уху1ре г1у1мирдихьван, лазим руъура са йыгъа.
Бала гьалганийды дюзды ч1елбыр ц1ам и, ц1ам гьалганийды ч1илмыд натидже бала виъи.
Капырахда инсаф адиш, гюллидихда ул адиш.
Яраллы вишид лы1кьы1ры къаргъа ягъмиш викиси.
Мукъу1хьван ара хадишды, йикьибишик кидишды.
Аллагьас гьац1ад кар, джама1хдыла гиркьа маъ.
Люъун дидды хала гьаъ, сахын нинды шуд хала гьаъ.
Нинды суруулад йик1ядыбыр диъи, дидды сурууладбыр мал таликьер диъи.
Выды ч1илихьде гиджийкьад инсан, джалгынийхьде ки гийкасдиш.
Йик1ид панагь ичи йиъи, ичиед панагь хьыв йиъи.
Г1ы1р кулурма мабана, цай хъаъас чалышых ма1гъв.
Гъа1раба кьат1 вишидыла хъуъ, ра1хъ гьувга ваъадбыр бала дишири.
Га1т кьу1лю макъыет виъид Аллагь бадана диш, ухьун бадана виъи.
Хъуъ сивхьид гвалаха у йиз лихьиси.
Душманара вы къатылыра йыхы1йне, ва выдж хьывара йыхь.
Вахт ес икьрар джившихьвна, е авхтиндис дишир йыгара.
Лаъ гакъыд лукур саъ лирхьуси, саъ гакъыд гъигъене лузаси.
Му1къ маса выд, мукъа1 ц1ыя лихьиси.
Ц1амды чемре джишихьвна, ха1ль утхасдиш.
Йыхвалихда кьиймет адиш, писвалды гъалиб викисдиш.
Къавымад бахче ад са вазыра и варлыд.
Са хукакла берки гьаъара хьид лац1ысды, дур ки ваъара ит улесды.
Суьхьде рыкъы1д юлдаш хурка, хьа1ли ра1хъ хубка.
Гъилы гъана викьид тыла йыха виъи, лувкур викьид асланахъаъ.
Хасиетсыз инсан дегиш йириш а, хьур, инамиш ма1гъв, я бан банахда йидкьыр а, хур.
Хьыбыл хана йиркьыд, хьум гъана хъу1гъу1си.
Ахмакь хала агъусды хъаъ, гьакьаллы ухнухда хъагуйне йыха и.
Вырды улире улед джуды ухьне диш.
Палыван чарасыз йикиси, пергер хадишди.

Бийзат РАМАЗАНОВА