Хьуъ кимериъ дуст, гъа1лядыбыр вас вылц1ад, йик1е адбыр душманас салтад.
Дустар веш дишир ки ц1амна гьадгвара, са душман балана.
Ватанды касибне йыха и, Мисриди Султан йикисды хъаъ.
Са эдемиед дур гьац1ыхьвна йыха и, вешнийды хьесым гьагвасды хъаъ.
Гъы1нне кьул лывырсанийды, кьы1нне гьа1йе1г лывырсаси.
Джуьлъур гвалах ваъанийды джандис зиян и, люъур гвалах ваъанийды халыс и.
Гьаатхьы1д вахтбыр ахъыгасдиш, сахъа1дхъы1д ц1ай лихъикьвасдиш.
Паст1урмадидне барутад ч1ел са вишийне, бат1рум тухьанга адгасдиш.
Эвеле таликьдыбыр дидды йыкьа1хъла хьасаба даъарай, гьамыъ нинды ичияла даъара.
Хьесымад быт1равалды къаш йиъи, тухумад быт1равалды выгъылды и.
Йигит сада йикьире, езид веше.
Йигит ч1ылы йикиси гъигъ, йипак — йит1ала.
Дух йишир йыгад и, капыр уху1сдына, йиванды леч1усды.
Йиван гъилабырмыла вац1ара, хъучах гьалгыныла.
Валгыра ваекла инсан гьаъара, йивандире мерд.
Джама1хдид капыр литедид йшир ки, гьадире вы йыхы1си.
Йиван викьийне, чул алгара, йигит йикьийне — дур.
Эккед мукъу1хда гьакьаллыер бала дикиси.
Ханара ливид белидикла джама1хдире гехъейиси.
Джама1хдид лаъвалды, мукъу1д савалды.
Мысна йыхвалды сивчесдиш, писвалды йик1иы убхасдиш.
Духарыс дид йыхы1д йик1иыла урхасдиш, г1арас джыбыр кубкьуд.
Вы бала иде йишихьвна, ара саъ сигаси, дакьыле йишихьвна, гъаъ хахъагъуси.
Иесси йикьир, хьур, мулк маса вылц1аддиш.
Иессиед хыл ливиркьад джигиды, маннийды ул ливкьаси.
Халды рак ачыхнийды, йик1ид ки йикиси.
Кьа1ч1 кид духул джиле гебгасдиш.
Арха ху1ляха1 дишнийды, капыр ху1ляха1 йикиси.
Дуст гьагус раха1т и, ху1рмет увуху1с четин и.
Кюйнед душманакла дуст мысна йикисдиш.
Ялхи бала и, йиванар — ц1ам и, джамахьа1т бала виъи, инсанвалды — ц1ам.
Хъархъанаг йыгъа сахын, виргъид тахсир и.
Дзыдзахъа1ре викьисды гедене, кылибыр агъабгъура.
Накьудид ранг джац1анийис, ха1льдыки гьац1асдиш.
Ханад хьури га1ма1буч, йыма1лед джибра хъа1ма1буч1.
Т1ыркьыд къаргъа, сагъдимыла кьыбди ливчеси.
Касибед йыгъ дердехьван кагъу1ре, зариехьван лабт1ура.
Джан кьа1се йикиси, хьур, гич1 мываъ, йик1 кьа1се магъу1й.
Са-сад гедене вахтинди лихьид къадамара, гьу1мирдид юруш дегиш ваъара.
Тембел дама руъусдиш, йыхьыхьвна, дам хъыджыдхъы1р хъикьаси.
Бийзат РАМАЗАНОВА
